Мин алтынньы 18-28 күннэригэр СӨ Бастакы Президенэ М.Е. Николаев төрөөбүт дойдутугар Хаҥалас улууһун Өктөм нэһилиэгэр баар СӨ Наукатын дьоҕус академиятыгар «Кэскил» хаһыат редакцията тэрийбит «Медиа-ракета «Кэскил» сменатыгар сынньанан, үөрэнэн кэлбитим. Үөһээ Бүлүү улууһун Дүллүкү орто оскуолатын «Эрчим» эдкорпоһуттан үс буолан барбыппыт.
Лааҕырга мин элбэх саҥаны биллим. 10 кун устата Айыына Ньургуновна, Кристина Олеговна, Григорий Григорьевич, Эльдар Андреевич уонна араас ыалдьыттар элбэххэ үөрэттилэр.
Бастакы күҥҥэ биһиги Өктөмҥө тиийээт, регистрацияны, ТБ инструктаһы ааспыппыт уонна олорор хоспутугар киирбиппит. Ол кэннэ академия интэринээтин сэбиэдиссэйэ интэринээккэ олоруу быраабылатын кэпсээбитэ.
Иккис күн учууталларбытын кытары билсиспиппит. Бэйэ-бэйэни кытта билсиһэр оонньуулары ыыппыттара, бастакы сорудахпытын биэрбиттэрэ. Сорудахпыт «ТОП-5» кинигэ уонна «ТОП-5» киинэ диэн буолбута. Иккилии буолан арахсан улэлээбиппит. Суруйан баран кэпсиирдии бэлэмнэммиппит. Бу оҥорбут матырыйаалбыт номнуо «Кэскиллээх олоххо бэлэм буол» сурунаал сэтинньи ыйдааҕы нүөмэригэр бэчээккэ барбыта.
Ити күн киэһээҥҥи аһылык кэнниттэн смена оҕолоругар баспытааталлар олус көрдөөх, интириэһинэй, өйү сайыннарар оонньуулары ыыппыттара.
Үһүс күммүтүгэр М.К. Аммосов аатынан ХИФУ «Литературное творчество» салаатын устудьуоннара Милена уонна Николай ыалдьыттаабыттара. Кинилэр биһиэхэ хайдах үөрэххэ туттарсыбыттарын, ЕГЭ-ҕа ханнык предметтэри туттарбыттарын, стипендияларын, хайдах үөрэнэ сылдьалларын туһунан сырдаппыттара. Ол кэнниттэн оҕолор суруналыыс буолар баҕабыт өссө үрдээбитэ.
Төрдүс күммүтүгэр «Бэлэм буол» сурунаалга ханнык рубрика итэҕэһин, өссө туох наадатын туһунан кэпсэппиппит. Бу сурунаалга кыргыттарга уонна уолаттарга аналлаах постердары көрбүппүт, лайфхактары толкуйдаан суруйбуппут, викториналары, ребустары таайбыппыт.
Бэһис күҥҥэ Эльдар Андреевичтыын хайдах интервьюну ыларга, ыстатыйаны сөпкө суруйарга үөрэммиппит. Урут суруйарбар туохха сыыһарбын өйдөөбүтүм.
Алтыс күҥҥэ видео монтаж оҥорорго үөрэммиппит. «5 аргументов приехать в МАН» диэн олус интириэһинэй сорудаҕы биэрбиттэрэ. «Кэрэспэдьиэн диэн кимий?» диэн кыракый тэттик видео устубуппут. Олус учугэй күн ааспыта.
Сэттис күҥҥэ ураты ыалдьыт «Кэскил» хаһыат худуоһунньуга Сахая Николаевна Солдатова кэлэн барбыта. Комикс уруһуйдуурга сорудаҕы биэрбитэ. Иккилии буолан арахсан комикс уруһуйдаабыппыт. Мин уонна Илона уруһуйдаабыт комикспыт «Кэскил» хаьыат 45-с нүөмэригэр соторутааҕыта тахсыбыта.
Ахсыс күҥҥэ М.К. Аммосов аатынан ХИФУ педагогическай институтун устудьуоннара ыалдьыттаабыттара. Араас сынньатар, толкуйдатар оонньуулары ыыппыттара. Онтон биир саамай сөбүлээбит оонньуум «Может ли человек управлять своей судьбой» диэн буолар. Бу оонньууга бэйэ-бэйэбит баҕа санаабытыгар тиийэ сатыахтаахпыт диэн этэ. Харахпытын баайаллар, биир киһи суолбутун сирдиир. Дебат буолбута, этиллибит темаларга презентациялары толкуйдаабыппыт.
Тохсус күҥҥэ «It- bootcamp» смена туһунан сиһилии суруйбуппут. Мин Михаил Оконешников диэн организатортан интервью ыламмын суруйбутум. Өссө мем уонна стикер онорорго үөрэммиппит.
Бүтэһик онус күҥҥэ «Бэлэм буол» сурунаалга ханнык рубрика тиийбэтин хамаандаҕа арахсан толкуйдаан, бырайыак оҥорбуппут, көмүскээбиппит. Араас викториналарга оонньообуппут. Учууталларбыт сэмэй бэлэхтэрин туттарбыттара, истиҥ, сылаас тылларынан ситиһиилэри баҕаран алҕаабыттара. Ол кэннэ сменабыт түмүктэнэн, учууталларбытын кытта хаартыскаҕа түһэн, куустуһан атаарбыппыт. Киэһэлик баспытааталлар үҥкүү киэһэтин тэрийбиттэрэ.
СӨ Наукатын дьоҕус академията олус кэрэ, ыраас, сырдьык дьиэ. Араас анал интэриэһинэй үлэлиир хостордоох, элбэх да элбэх үүнээйилэрдээх, наһаа улахан, 3 этээстээх, аныгылыы кэрэ оҥоһуулаах.
Бу олус туһалаах лааҕырга ийэм Саргылаана Петровна, учууталым Антонина Ивановна сүбэлээн ыытан, Өктөмҥө олус үчүгэйдик үөрэнэн, сынньанан кэллим.
10 кун устата үгүс саҥаҕа, сонуҥҥа үөрэппит учууталларбар Айыына Ньургуновна Трофимоваҕа, Кристина Олеговна Ивановаҕа, Григорий Григорьевич Местниковка, Элдьар Андреевич Садовниковка махтанабын. Минньигэстик аһаппыт асчыттарга, биһигини көрө-истэ сылдьыбыт, элбэх көрдөөх оонньуулары оонньоппут баспытааталларга истиҥ сыһыаҥҥытыгар эмиэ махтанабын. «Медиа-смена «Кэскил» оҕолоро, саҥа доҕотторум, эһигини кытары 10 күн оҕо сааһым умнуллубат кэрэ күннэрэ аастылар. Куруук өйдүү-саныы сылдьыаҕым.
Алина Санникова, VIII кылаас,
«Эрчим» корпост.
Үөһээ Бүлүү, Дүллүкү.