Суруналыыс күннээҕи олоҕу, араас өҥүнэн арылыйа оонньуур, алмаас таастыы киэргэтэр дьоҕурдаах киһи. Билигин суруналыыстыкаҕа бастакы хардыыларын оҥорон, «Кэскил» оҕо хаһыатын көхтөөх кэрэспэдьиэннэрэ СӨ Наука аччыгый академиятыгар үөрэнэ сылдьаллар.
Алтынньы 18 күнүттэн «Медиа-ракета «Кэскил» смена үлэтин саҕалаата. Бүлүүттэн уонна Үөһээ Бүлүүттэн уопсайа 11 оҕо кэллэ. 10 күн иһигэр тиэкис, интервью суруллуутун, видео устуутун, таҥыытын үөрэтиэхтэрэ. Ону тэҥэ, сурунаал оҥоруутугар кыттыыны ылыахтара, ыалдьыттары кытта көрсүһүөхтэрэ.
Биллиилээх фигуристка курдук ааттаах — Алина Загитова, Г. И. Чиряев аатынан Бүлүү 1 нүөмэрдээх орто оскуолатын 7 кылааһын үөрэнээччитэ:
-Мин ийэм «Олох суола» диэн улуустааҕы хаһыат эрэдээктэрэ. Ол иһин, кыра эрдэхпиттэн репортер буолар баҕалаахпын. Киниэхэ араас идиэйэлэри биэрэбин, телеграмм-ханаалы ыытарга көмөлөһөбүн. Бу лааҕырга элбэҕи билэр-көрөр сыаллаах кэлбитим.
Саян Павлов, Үөһээ Бүлүү улууһун Ороһу орто оскуолатын 7 кылааһын үөрэнээччитэ:
-Оскуолабыт иһинэн кэрэспэдьиэннэр куруһуоктара үлэлиир. Салайааччыбыт Нина Никитична Михайлова. Бэйэм волейболунан дьарыктанабын. Араас блогердары интэриэһиргээн көрөбүн. Мин видеомонтажка үөрэниэхпин баҕарабын.
Алина Санникова, Үөһээ Бүлүү улууһун Дүллүкү орто оскуолатын 8 кылааһын үөрэнээччитэ:
-Эдэр кэрэспэдьиэн куруһуокупутун Антонина Ивановна Афанасьева салайар. Научнай конференцияларга кыттабын уонна спордунан дьарыктанабын, чуолаан, сүүрэбин. «Кэскил» хаһыаты, «Бэлэм Буол» сурунаалы сөбүлээн ааҕабын. Бу үөрэхтэн ыстатыйаны таба суруйарга, видеоны таҥыыга үөрэниэхпин баҕарабын.
Света Каратаева, Г. И. Чиряев аатынан Бүлүү 1 нүөмэрдээх орто оскуолатын 9 кылааһын үөрэнээччитэ:
-Марианна Константиновна Ионова салайар куруһуогар дьарыктанабын. Ордук нууччалыы суруйабын уонна хаартыскаҕа түһэрэрбин сөбүлүүбүн. Кинигэни ааҕарбыттан астынабын. Саамай сөбүлүүр кинигэм — «Таймлесс» (ааптар Керстин Гир).
Диана Назарова, Г. И. Чиряев аатынан Бүлүү 1 нүөмэрдээх орто оскуолатын 8 кылааһын үөрэнээччитэ:
-7 cыл музыкальнай оскуолаҕа үөрэммитим. Фортепианоҕа оонньуубун, ыллыыбын, уруһуйдуубун, үҥкүүлүүбүн. Ыстатыйалары суруйарга оскуолабытыгар Марианна Константиновна Ионова олус үчүгэйдик дьарыктыыр. Медиа-смена — улахан кыах, өйөбүл буолар. Манна интервьюну, текиһи хайдах суруйарга үөрэнэ кэллим.
Гульнара Тобохова, Үөһээ Бүлүү улууһун Дүллүкү орто оскуолатын 8 кылааһын үөрэнээччитэ:
-Оскуолам лиидэрэ буолабын. Волейболлуурбун сөбүлүүбүн. Мин ордук видеоны таҥыыга дьарыктаныахпын баҕарабын. Күнтэн күн саҥаны билэбин, элбэххэ үөрэнэбин. Ылбыт билиибин — барытын оскуолабар туһаныам.
Ксения Семенова, Үөһээ Бүлүү улууһун Ороһу орто оскуолатын 8 кылааһын үөрэнээччитэ:
-Видеоны таҥыыга утумнаахтык дьарыктанар сыаллаахпын. Маннык тэрээһиннэргэ сыаналыырым диэн — оҕолору кытта билсэбин, элбэх саҥа доҕоттордонобун.
Илона Руфова, Үөһээ Бүлүү улууһун Дүллүкү орто оскуолатын 9 кылааһын үөрэнээччитэ:
-Мин суруналыыстыка эйгэтин — барытын баһылыам этэ. Суруйууга даҕаны, видеоны уһулууга, таҥыыга тардыһыылаахпын.
Варя Колтовская, Г. С. Донской аатынан Бүлүү 2 нүөмэрдээх орто оскуолатын 11 кылааһын үөрэнээччитэ:
-Екатерина Николаевна Сотрудникова салайар «Ровесник» куруһуокка дьарыктанабын. Оскуоланы бүтэрэрим бу кэллэ. Суһал көмө сулууспа үлэһитин идэтин баһылыахпын баҕарабын. Ол эрээри, суруналыыстыка эйгэтин кыра эрдэхпиттэн сэҥээрэбин. Хаартыскаҕа түһэрэрбин, видеоҕа уһуларбын ордоробун.
Оля Николаева, Г. И. Чиряев аатынан Бүлүү 1 нүөмэрдээх орто оскуолатын 8 кылааһын үөрэнээччитэ:
-Медиа-сменаҕа үһүспүн сылдьабын. Сайын, Эльдар Андреевич салайааччылаах, «Табыс» ыччат бэстибээлин сырдаппыппыт. Бэйэм ыллыырбын сөбүлүүбүн. Видеоны таҥары сатыыбын эрээри, билбэтим элбэх буоллаҕа дии. Онон билиини сомсо, саҥаҕа үөрэнэ кэллим.
Валера Ласточкин, Үөһээ Бүлүү улууһун Ороһу орто оскуолатын 8 кылааһын үөрэнээччитэ:
-Футболунан, волейболунан, ыарахан атлетиканан дьарыктанабын. Ону таһынан, убайдарбар ырыа суруйарга көмөлөһөбүн. Олоҥхо Ыһыаҕар, Кристина Олеговна салайааччылаах, кэрэсэпэдьиэннээбитим, араас ыстатыйалары суруйбутум. Идэтин толору баһылаабыт видеомонтажер буолуохпун баҕарабын.
«Медиа-ракета Кэскил» лааҕыр оҕолорбутугар үрдүк чыпчааллары дабайыыга, сыалларын ситиһэргэ, баҕар, инники идэлэрин таларга сирдиир суол буолар. Хас биирдии иитиллээччигэ ситиһиини, дьулууру, сатабылы, элбэх билиини баҕарабыт!
Эльдар Садовников