Тохсунньу 26-31 күннэригэр Дьокуускайга «Бэс чагда» оҕо лааҕырыгар «Биһиги бииргэбит» диэн ааттаах суруйар, айар-тутар оҕолорго аналлаах медиасменаҕа сырыттыбыт. Нэдиэлэ устата элбэх үчүгэйгэ үөрэннибит, интэриэһинэйи биллибит. Араас оҕолору кытта билсэн, доҕордоһон кэллим.
Биһиги тэрээһиммит умсугутуулаах этэ. «Саха» НКИХ биэриилэрин ыытааччыта, биллиилээх суруналыыс Георгий Белоусовы кытта смена иккис күнүгэр көрсүһүүбүт ураты өйдөбүлү хаалларда. Георгий юнкортан саҕалаан идэтийбит суруналыыс буолбут суолун туһунан сиһилии кэпсээбитэ. Бу тэрээһини мин олус сэҥээрдим, эдэр суруналыыстары талааннарын сайыннарарга, иннин диэки барарга сүбэлээтэ.
Ордук сэҥээрбитим хамаандаларга арахсан араас омуктар үгэстэрин сырдатар видеолары устуубут буолар. Мин кийиит кыыс оруолун толорбутум. Барыбытын тоҕус хамаандаҕа араарбыттара уонна араас омуктар тустарынан темалары биэрбиттэрэ, биһиэхэ казах омугун сыбаайбата түбэспитэ. Хамаандабытыгар тохсуо этибит.
Казахстантан сылдьар тревел-блогер Берик Есенгалиевы кытта телефонунан сибээстэһэн видеобытыгар материал ылбыппыт. Кэлин видеобытын блогер бэйэтин каналыгар таһаарбытын көрөн үөрбүппүт.
Түмүгэр биһиги хамаандабыт 3 миэстэ буолбута. Бу курдук лааҕырга сылдьан элбэххэ үөрэнним, саҥа доҕоттордоннум, араас интэриэһинэй тэрээһиннэри биллим, кытынным.
Устя Лазарева, Уолба орто оскуолатын 7 кылааһын үөрэнээччитэ,Таатта.
keskil14.ru