Уус-Алдаҥҥа «Саха КВН» Саха Өрөспүүбүлүкэтин ыччат дьыалатын уонна социальнай коммуникацияларга министиэристибэтэ, Саха Өрөспүүбүлүкэтин үөрэҕин уонна наукатын министиэристибэтэ, Саха Өрөспүүбүлүкэтигэр оҕо быраабын араҥаччылыыр болномуочунайа, «Юные якутяне» өрөспүүбүлүкэтээҕи тирэх киин, Саха Өрөспүүбүлүкэтин оҕолорун уопсастыбаннай холбоһуктарын сойууһа, Саха Өрөспүүбүлүкэтин «Саха КВН Лигата» ыччат уопсастыбаннай тэрилтэтин тэрийиилэринэн муус устар 13-14 күннэригэр Уус-Алдан улууһун Бороҕон сэлиэнньэтигэр XXII-с өрөспүүбүлүкэтээҕи оскуола оҕолоругар «Саха КВН» күрэҕэ буолла.
Тэрээһин сыала-соруга: «Cаха КВН» хамсааhынын салгыы сайыннарыы; оскуола оҕото үөрэх таһынан дьарыктаах буолуутун хааччыйыы; саха ыччата төрөөбүт тылын туттар эйгэтин кэҥэтии; бастыҥ хамаандалары уонна оонньооччулары бэлиэтээhин; араас улуустар хамаандаларын икки ардыларыгар доҕордуу сыһыаны кэҥэтии; өрөспүүбүлүкэтээҕи «Саха КВН» оонньууларын кыайыылааҕын быһаарыы.
Быйыл күрэх 2019 сылтан тохтоон баран саҥа ыытылынна. Оонньууга муниципальнай түһүмэҕи ааспыт, сүүмэрдэммит 12 хамаанда кыттыыны ылла: Уус-Алдан, Бүлүү, Амма, Үөһээ Бүлүү, Таатта, Сунтаар, Ньурба, Мэҥэ-Хаҥалас, Горнай. Икки күннээх оонньуу уопсай тиэмэтэ «Кыайыыга мин 100 хардыым!».
Бастакы күн ыалдьыттары, хамаандалары көрсүү буолла. Оҕолорго сыанаҕа тутта-хапта сылдьыыларыгар, култуураҕа, артыыстыыр дьоҕурдарын арыйыыга Саха Өрөспүүбүлүкэтин оҕолорун уопсастыбаннай холбоһуктарын сойууһун председэтэлэ Геннадий Охлопков тэрийээччилэрин кытта хамаандаларын көрдүлэр-иһиттилэр, туһалаах дьарыктары ыыттылар. Оҕону эбии үөрэхтээһин киинин директора Яков Колодезников, Саха Өрөспүүбүлүкэтин оҕолорун уопсастыбаннай холбоһуктарын сойууһун председэтэлэ Геннадий Охлопков оонньуу үөрүүлээх аһыллыытыгар кыттааччылары эҕэрдэлээтилэр. Саха КВН сайдыытын туһунан, хас биирдии улууска ыччаттарга аналлаах КВН күрэҕэ ыытыллыа диэн эттилэр.
Иккис күн «Музыкальнай дьиэҕэ сорудах» көрүүтэ уонна икки күннээх оонньуу түмүгүн таһаарыы, наҕараадалааһын буолла. Икки күн устата хамаандалар бэйэни билиһиннэриилэриттэн саҕалаан, кыайыыга-хотууга бэлэмнээхтэрин, булугас өйдөөхтөрүн, көр-күлүү, үөрүү-көтүү аргыстаахтарын, талба талааннаахтарын көрдөрдүлэр.
Оонньуу түмүгүнэн хамаандаларга маннык анал ааттар иҥэрилиннилэр: «Күн күлүүк» (Мисс КВН) – Нарыйа Попова (Уус-Алдан), «Көрдөөх көкөт» (Мистер КВН) – Семен Павлов (Үөһээ Бүлүү), «Бастыҥ куолас» — Алик Григорьев (Таатта), «Дорҕоон доҕор» («Бастыҥ топер») – Анастасия Романова (Мэҥэ-Хаҥалас), «Саталлаах саарын» — Мичил Николаевич Дегтярев (Уус-Алдан), «Уран тыл маастара», «Мэкчиргэ мэйии» — Айыккабыан (Үөһээ Бүлүү), «Алтан чуораан» («Бастыҥ музыкальнай дьиэҕэ сорудах») – Мэхээлэ сиэннэрэ (Бүлүү), «Көрөөччүлэр биһирэбиллэрэ» — Алаас оҕолоро (Уус-Алдан), «Наара суох» («Бастыҥ көрүдьүөс») — СахаStar (Горнай), «Бастыҥ кыах» — Күн дьоно (Сунтаар), «Саха КВН эрэлэ». Маны таһынан оонньуу чэрчитинэн «Кырдьыгы – күлүүлээхтик» диэн тиэмэлээх Саха Өрөспүүбүлүкэтигэр оҕо быраабын араҥаччылыыр болумуочунайын Кубогын ылла «Чаҕылхайдар» хамаанда (Амма), кинилэр сыаналаах бириис уонна көһө сылдьар кубок туттулар. Кыайыылаах хамаандаларга диплом, кубок уонна сыаналаах бириис туттарылынна. Бастакы миэстэни ылла – Уус-Алдан улууһун «Дьулуур» (сал.Дегтярев М.Н.), иккис миэстэни – Мэҥэ-Хаҥалас улууһун «Чиккэстэр» (сал.Жиркова А.П.), үһүс миэстэни Таатта улууһун «Ситик» (сал.Алексеева М.Д.) хамаандалара ыллылар.
«Чиккэстэр» финал туһунан кылгас санаалара:
Анна Петровна Жиркова («Чиккэстэр» хамаанда салайааччыта):
— Бу ый муус устар 13-14 күннэригэр Уус-Алдан улууһун Бороҕон сэлиэнньэтигэр ХХII төгүлүн өрөспүүбүлүкэтээҕи оскуола оҕолоругар «Саха КВН» күрэҕэ үрдүк таһымнаахтык буолан ааста. Биһиэхэ бу барыта саҥа арыйыы, саҥа сүүрээн буолар. Ол курдук, улууспутугар 1 миэстэ ылан республикаҕа улуус чиэһин көмүскүү барар олус эппиэтинэстээх, долгутуулаах буолар. Ол да буоллар, улууспут чиэһин туһэн биэрбэккэ, 10 хамаандаттан бочуоттаах 2 миэстэни ылары ситистибит. Бу биһиэхэ улахан ситиһии, кыайыы буолар. «Чиккэстэр» хамаанда оҕолорум олус диэн сөбүлээн, элбэххэ үөрэнэн, саҥаны билэн-көрөн, олус элбэх оҕолору кытта билсэн, санаа атастаһан, ис сүрэхтэн астынан-дуоһуйан кэллибит. Биһиги руководителлэр бэйэбит эмиэ элбэххэ үөрэнэн, опыт ылынан, саҥа саҕахтары саҕарга бу сылдьыыбыт төһүү күүс буолуо диэн эрэнэбин. Барҕа махтал буоллун бука бары көмөлөспүт, үлэлэспит дьоммутугар🫰🏻 Саха КВН өрүү баар буол, өрүү баар буол Саха КВН! Саха КВН-ныын аргыстас, үрдүккэ-кэрэҕэ талас!
Антон Захаров, 9 кылаас:
— Мин хамаандалар олуһун диэн бэлэмнэнэн, Саха Сирин саамай күүстээх квнщиктара кэлбиттэр диэн сыаналаатым. Үчүгэй баҕайы кэпсэтинньэҥ оҕолору кытта доҕордостум, бары наһаа бэһиэлэйдэр.
Настя Романова, 7 кылаас:
— Оҕолор көрдөрүүлэрэ барыларын киэнэ олус атын, хаһан даҕаны оннугу көрбөтөҕүм.
Лиза Фомина, 7 кылаас:
— Мин саамай өйдөөн хаалбытым диэн олус элбэх оҕо, күүстээх хамаандалар. Көрөөччүлэр ыалдьааһыннара киһини үөрдэр. Бастаан сыанаҕа тахсыам иннинэ олуһун диэн долгуйар этим. Онтон тахсан баран наһаа астыммытым уонна сөбүлээбитим сыанаҕа сылдьарбын.
Андрей Куприянов, 10 кылаас:
— Финалга Саха Сирин улуустарыттан күүстээхтэн күүстээхтэр кэлбиттэр, бары наһаа үчүгэйдэр, бары кыахтаахтар. Астына-дуоһуйа оҕолору кытта билсэн-көрсөн, тото- хана аһаан, үчүгэйдик утуйан, астыктык сылдьан кэллибит. Итинник сылдьар ынырык үчүгэй эбит. КВН оҕолоро бары кэпсэтинньэҥ, туохтан да кыбыстыбат баҕайы оҕолор эбит. Уопсайынан финал диэн «мясорубка» курдук киирсии эбит, олох хас да ыйы быһа бэлэмнэммиккин кэлэҥҥин биирдэ кутан кэбиһэҕин, ол кэннэ чэпчиир да чэпчиир эбиккин.
Миша Николаев, 9 кылаас:
— Мин санааларым: бары үөрэ-көтө сылдьаллар, күүстэээх баҕайы командалар этилэр, олус үчүгэй 2 күннэр этилэр.
«Чиккэстэр» хамаанда аатыттан махталбытын тиэрдиэ этибит хас биирдии биһиэхэ көмөлөспүт, ыалдьыбыт, күүс-көмө буолбут дьоммутугар. Ону таһынан «Чиккэстэр» оҕолорун аатыттан улахан махталбытын тиэрдиэ этибит биһиги тапталлаах убаастыыр Анна Петровнабытыгар.
Өрүүтүн барыбытын өйөөн, таптаан, өйдөөн илдьэ сылдьарыгар. ЭН баар буолаҥҥын биһиги КВН диэн тугун биллибит, ЭН эрэ баар буолаҥҥын элбэх доҕордоннубут! Биһиги өссө да сайдан иһиэхпит, ЭН биһиэхэ эрэнэриҥ биһиэхэ сэниэ биэрэр, олус өйдөөн-өйөөн биһигини илдьэ сылдьаргар махтанабыт! Анна Петровна, өйөбүлүҥ уонна тапталыҥ биһиэхэ көмүстээҕэр сыаналаах, ону өйдөө, ынырык бэлэмнээбит, үлэлээбит түмүгүн бу баар. Кэлэр финалга хайаан даҕаны бастыахпыт! Анна Петровна баар буолан КВН биһиги сүрэхпитигэр баар. Олус күүскэ таптыыбыт. Саха КВН өрүү баар буол, өрүү баар буол Саха КВН!
Захарова Сайаана, 10 кылаас, «Проба пера» эдкора, «Чиккэстэр» КВН хамаанда чилиэнэ.
1
Наһаа үчүгэйдик сылдьан, кыттан кэллибит✊