Бүгүн, бэс ыйын 9 күнүгэр, Мэҥэ Хаҥалас улууһун киинэ Аллараа Бэстээх нэһилиэгэ Норуоттар икки ардыларынааҕы VIII «Азия оҕолоро» спортивнай Оонньуулар уотун тутта. Чулууттан чулуу үгүс ситиһиилээх спортсменнарбыт Оонньуулар уоттарын киэн тутта бэрсэн истилэр.
Улууспут Аҕа баһылыга Дмитрий Иванович Тихонов факелы тутан туран санаатын үллэһиннэ: «Эстафетаҕа кыттыым мин олоҕум биир улахан долгутуулаах умнуллубат түгэнэ буолар. «Азия оҕолоро» оонньууларын Михаил Ефимович Николаев Саха сирин оҕолоро атын дойду оҕолорун кытта тэбис-тэҥҥэ, күөн күрэскэ да буоллун, өй-санаа өттүгэр да буоллун, кимтэн да итэҕэһэ суох сайдан, аан дойдуга биллэр-көстөр ыччат буолан үүнэн таҕыстыннар диэн бу тэрээһини ыыппыта. Ол олус сөптөөх толкуй, быһаарыныы эбит уонна үтүө түмүктэрэ күн бүгүн арылхайдык көстөллөр. Онон Михаил Ефимовичка ытыктабыл улахан! Биһиги улууспутуттан бу Оонньууларга 18 оҕо кыттаары бэлэмнэнэ сылдьар. Кинилэргэ Сахабыт сирин ааттатыахтара уонна инникитин да норуот хаһаайыстыбатын бары хайысхатыгар үлэлээн-хамсаан бу Оонньуулартан тирэх ыланнар, арылланнар, бэйэлэрин кыахтарын өссө кэҥэтэн, үрдүк таһымҥа тахсан иһиэхтэрэ диэн эрэлбит улахан».
Салҕыы факелы тутуу эстафетатын Амма улууһугар ыыттылар. Оҕолорбутугар үрдүк ситиһиини баҕарыаххайыҥ!
Мария Барабанова, И.Г. Тимофеев аатынан
Майа лиссиэйин 10 кылааһын үөрэнээччитэ