Ахсынньы 25 күнүгэр Мэҥэ-Хаҥалас улууһун баһылыгын Саҥа дьыллааҕы харыйата ыытылынна.
Улууспут иитии концепциятын 6 хайысхатынан «Мэҥэ кэскилэ» оҕо хамсааһынын 2022 сыл түмүгүнэн Мэҥэ-Хаҥалас улууһугар 150-тэн элбэх ахсааннаах оҕолоох оскуолалартан Арассыыйатааҕы оҕо хамсааһынын (РДШ) бырайыактарын ситиһиилээхтик тэрийэн үлэлэтэр Ф.Г. Охлопков аатынан Майа орто оскуолатын «Феникс» оҕо тэрилтэтэ кыайыылааҕынан ааттанна.
Ону таһынан үөрүүлээх тэрээһиҥҥэ оскуолабыт бастыҥ, киэҥ туттар, туйгун үөрэхтээх, улуустааҕы, өрөспүүбүлүкэтээҕи, Арассыыйа уонна норуоттар икки ардыларынааҕы спортивнай, култуурунай күрэхтэргэ, куонкурустарга, олимпиадаларга үрдүк ситиһиилээх үөрэнээччилэрбит Айкар Марков, 9-а кылаас, Дайаана Тобонова, 9-а кылаас, Юмико Чирикова, 8-б кылаас, Юля Корякина, 11-б кылаас уонна Элла Сергучева, 11-б кылаас кыттыыны ыллылар.
Оҕолору улууспут баһылыга Дмитрий Тихонов, улуустааҕы үөрэҕирии управлениетын начаалынньыга Николай Никифоров эҕэрдэлээтилэр, анал ааттары, бэлэхтэри туттардылар.
Саҥа үүнэр сылга оҕолорбутугар туйгун үөрэҕи, чэгиэн доруобуйаны, ситиһиилэри баҕарабыт, үүнэн-сайдан төрөөбүт дойдугут туһугар үтүө үлэһит дьон буолуоххут диэн эрэнэбит!
«ОхлопковNews», Ф.Г. Охлопков аатынан Майа орто оскуолата.