Улууспут бары нэһилиэктэрин оскуолаларыттан бастыҥ, актыбыыс оҕолоро аҕа баһылык Дмитрий Иванович Тихонов «Дьоһуннах кэпсэтии» төгүрүк остуолугар кыттыыны ыллылар.
Тэрээһин саҕаланыытыгар Майа лицейин актыбыыстара 5 түһүмэхтээх интеллектуальнай оонньууну ыыппыттара. Оҕолор этэрээтинэн арахсан оонньоотулар, уопсайа 3 хамаанда кыайыылаах буолла. Кинилэргэ улуус администрацията өйдөбүнньүк кинигэлэри бэлэхтээтэ.
Хамаандалар хамандыырдара «аһаҕас» микрофоҥҥа бэйэлэрин санааларын сайа эттилэр.
Салгыы төгүрүк остуолга Дмитрий Иванович Тихоновтыын кэпсэтии буолла. Маны таһынан экономиһы кытта диалог ыытылынна. Саха сириттэн хас да оскуола быһа эфирга холбонон, экономикаҕа сыһыаннаах араас ыйытыктары биэрдилэр.
Тэрээһин бүтүүтэ барыларыгар туоһу сурук, значок туттардылар. Бу маннык тэрээһиннэр ыытыллаллара олус наадалаах дии саныыбын. Улууспут, өрөспүүбүлүкэбит сайдарыгар эдэр ыччат биир санаалаах, түмсүүлээх буолуохтаах.
Оксана Петрова,
Павловскай орто оскуолатын пресс киинэ.