Мэҥэ Хаҥалас улууһун бары нэһилиэктэрин оскуолаларын бастыҥ, актыбыыс оҕолоро аҕа баһылык Дмитрий Иванович Тихонов «Дьоһуннах кэпсэтии» төгүрүк остуолугар кыттыыны ыллылар.
Тэрээһин саҕаланыытыгар Майа лицейын актыбыыстара 5 түһүмэхтээх интеллектуальнай оонньуу ыыппыттара. Оҕолор этэрээтинэн арахсан, уопсайа 3 хамаанда кыайыылаах буолла. Кыайыылаах хамаандаларга улуус дьаһалтата өйдөбүнньүк кинигэ бэлэхтээтэ. Хамаандалар хамандыырдара аһаҕас микрофоҥҥа бэйэлэрин санааларын аһаҕастык эттилэр.
Салгыы төгүрүк остуолга Дмитрий Иванович Тихоновтыын кэпсэтии буолла. Маны таһынан, экономиһы кытта диалог ыытылынна. Саха сириттэн хас да оскуола быһа эфиргэ холбонон, араас экономикаҕа сыһыаннаах ыйытыктары биэрдилэр. Тэрээһин бүтүүтэ барыларыгар туоһу сурук, значок туттардылар.
Бу маннык тэрээһиннэр ыытыллаллара олус наадалаах дии саныыбын. Улууспут, өрөспүүбүлүкэбит сайдарыгар эдэр ыччат биир санаалаах, түмсүүлээх буолуохтаах. Маннык курдук тэрээһиннэр өссө да ыытылла турдуннар.
Оксана Петрова, Павловскай орто оскуолатын пресс-киинэ.