Самаан сайын сатыылаан, дьэ, сайыҥҥы сынньалаҥ, лааҕырдар үлэлэрэ саҕаланна. Оскуолабыт «Эйгэ» лааҕыра кыраайы үөрэтэр хайысхалаах. Саастарынан уонна сүһүөхтэринэн арахсан, оҕолор араас интэриэһинэй тэрээһиннэри толкуйдууллар, оонньуулар. Үөрэнээччилэр Ярик Григорьев, Каролина Аталларова уонна ХИФУ устудьуона Павлова Виктория Владиславовна баһаатайдыыллар.
Соторутааҕыта лааҕырбытыгар Дьокуускайдааҕы национальнай гимназия үөрэнээччилэрэ уонна «Олох үөрэҕэ» лаборатория салайааччыта Т.И.Жиркова кэллиэгэлэрин кытта «Өбүгэлэрбит аартык суолларынан» диэн экспедиция чэрчитинэн кэлэн ыалдьыттаатылар.
Мин хайдах, ханан сылдьалларын билээри уонна «Куорсун» пресс-киин сорудаҕынан икки күн сырыттым.
Бастакы күн:
Лааҕыр оҕолоро сахалыы сиэринэн ыалдьыттары алаадьылаах, кымыстаах көрүстүлэр . «Эйгэлэр» ырыалаах, үнкүүлээх кыра кэнсиэри көрдөрдүлэр.
Оскуола мусуойугар үөрэх завуһа Мария Гаврильевна нэһилиэкпит устуоруйатын кэпсээтэ. Пуобарбыт Марфа Дмитриевна минньигэс эбиэтин аһаан-сиэн, ыалдьыттар айаннарын Уһун Эбэттэн саҕалаатылар. Матта бастакы оскуолатын аһаҕас мусуойугар, тыыл бэтэрээннэригэр аналлаах ытык бэлиэҕэ сырыттылар.
Салгыы Матта биир кэрэ сиригэр, Дьаргымах алааска, тыаллаах, тымныы диэбэккэ, ыалдьыттар уонна «эйгэлэр» «веревочнай» оонньуулары оонньоон, бэйэ-бэйэлэрин кытта билистилэр.
Иккис күн:
Оҕолор, ыалдьыттар сарсыардааҥы аһылыктарын аһаан, бүтэһик машруттарыгар ардах аннынан туруннулар. Өбүгэлэрбит олорбут «Кулун атах» ытык сиргэ сатыы тиийэн көрдүлэр.
VIII кылаас үөрэнээччитэ Ярик Григорьев уонна лааҕыр салайааччыта Вероника Валерьевна алаас устуоруйатын кэпсээтилэр.
Экспедиция түмүктэнэн, «Эйгэ» оҕолоро уонна ЯГНГ үөрэнээччилэрэ икки күн тугу билбиттэрин, сэргээбиттэрин рефлексиялаатылар, ыалдьыттар саамай көхтөөх оҕолорго сэмэй бэлэхтэрин туттардылар. Онтон биһиги икки күн сылдьыбыт айаннарыттан хаартысканан коллаж оҥорон, утары бэлэх туттардылар.
Төһө да ардахтаах күннэр турбуттарын иһин, оҕолорго элбэх интэриэһинэй, умнуллубат түгэннэр аастылар. Кэлэр сылга “Матта +ЯГНГ= доҕордоһуу” бырайыак салҕанарын туһунан бары биир санаанан эттилэр. “Эһиил көрсүөххэ диэри!” — диэн «Эйгэ» оҕолоро сайыһа хааллылар.
Даяна Кычкина, IX кылаас,» Куорсун» пресс-центр.
Е.Д.Кычкин аатынан Матта орто оскуолата, Мэҥэ-Хаҥалас.