Бу күннэргэ Харбалаахтааҕы үөрэхтээһин холбоһугар мас ууһун уонна кыра массыыналары көрүү-истии, өрөмүөннээһин сатабылларын төһө иҥэриммиттэрин сыаналыыр улуустааҕы үөрэнээччилэр ортолоругар күрэх буолан ааста. Билиҥҥи кэмҥэ уол оҕоҕо олус наадалаах сатабыллары төһө баһылаабыттарын көрүү, сыаналааһын кинилэр дьоҕурдара сайдарыгар улахан туһалаах уонна кэскиллээх тэрээһин буолар.
Массыынаны көрүү-истии уонна өрөмүөннээһин күрэҕин маастар Ксенофонтов Алексей Александрович сүрүннээн салайан ыытта. Түмүккэ Игидэйтэн кэлбит Потапов Вадим маҥнайгы миэстэни ылла. Иккистээх үсүһү Харбалаахтааҕы үөрэхтээһин холбоһугун 10 кылааһын үөрэнээччилэрэ Винокуров Вадим уонна Иванов Сайаан үллэһиннилэр. Бу уолаттары С.В.Петров бэлэмнээн, кытыннарда. Манна сыһыаран эттэххэ, Сергей Васильевич бэлэмнээбит Сердцев Евгенийэ икки сыл улууска бастаабыта, икки сыл өрөспүүбүлүкэҕэ 2 миэстэни ылан, Харбалаахтааҕы үөрэхтээһин холбоһугун ааттатан турар.
Аны мас ууһун идэтин баһылаабыт уол оҕо олоҕор толору бэлэмнээх буолара мөккүөрэ суох! Бу көрүҥү салайан ыытта Рахматуллин Василий Нюрьевич. Оҕолор бары сатабылларын туһанан киһи кэрэхсиир оҥоһуктарын уһанан таһаардылар.
Түмүк маннык буолла:
1 миэстэ — Айтал Борисов, Чөркөөх.
2 миэстэ — Оскар Семенов, Чөркөөх. Салайааччылара Богдокумов Иван Васильевич.
3 миэстэ — Ян Васильев, Харбалаах, салайааччы Громов Андрей Альбертович.
Күрэххэ кыттыбыт бары үөрэнээччилэргэ сатабылгыт сайыннын, кэскиллээх дьон буолуҥ диэн бары бастыҥ баҕа санаабытын тиэрдэбит!
Валентина Кривошапкина, Харбалаах.
keskil14.ru