Ахсынньы ый 4 күнүгэр Орто-Дойдутааҕы сынньалаҥ дьиэ иһинэн нэһилиэк инбэлииттэригэр аналлаах бэрт сонун тэрээһин буолан ааста. Оҕо суруйааччыта Мария Федотова–Нулгынэт «Мэрлэн» диэн остуоруйа- пьесатын «Удин» оҕо этно-фольклорнай ансаамбыла толорон көрдөрдө. Сүрүн оруолларга алтыс кылаас үөрэнээччилэрэ Антон Абашев, Ньургун Павлов, Эльдар Старков уонна бэҺис кылаас үөрэнээччитэ Айуран Павлов оонньоотулар.
Пьесаны «Удин» ансамбль салайааччыта Кылаана Егоровна Слепцова туруорда. Кини «удиннары» 1995 сылтан салайар, ол тухары элбэх көлүөнэ оҕолоро дьарыктанан аастылар. Урукку сылларга Нулгынэт «Эниҥэ», «Эбдэки кыргыттара», «Хорооло Хоһуун» остуоруйаларынан пьесалары туруоран муҥутуур кыайыыны ситиспиттэрэ, лауреаттар ааттарын ылбыттара. Онон «удиннар» эбээннии ыллыыры, үҥкүүлүүрү таһынан, сахалыы остуоруйаны эмиэ толороллор. Оскуолаҕа эбээннии тыл үөрэтиллэрин саҕана, орто көлүөнэ «удиннар» кылгас остуоруйалары, эбээннии тылынан толорор этилэр.
Сэтинньи ыйга арктическай улуустарга Мария Федотова–Нулгынэт айымньыларыгар Орто-Дойдутааҕы сынньалаҥ дьиэ иһинэн онлайн-куонкурус биллэриллибитэ. Остуоруйаны ааҕан баран, өйтөн уруһуйдааһын, хаартыскаҕа түһүү, аҕыйах мүнүүтэ оруолларынан оонньоон көрдөрүү түһүмэхтэрдээх бэртээхэй күрэх буолан ааста. Усуйаанаттан Хайыр орто оскуолатын үөрэнээччилэрэ Архип Болтунов, Айыына Сергеева, Согдиана Махатырова уруһуйдарын сыаналаатыбыт. Сертификат, харчынан бириэмийэ ыыттыбыт. Салайааччыларыгар саха тылын учууталыгар Е.И. Неустроеваҕа махталбытын тиэрдэбит. Муома оройуонун Соболоох оскуолатын алын кылааһын үөрэнээччилэрэ акварелинэн олус элбэх үчүгэй үлэни ыытаннар, Артем Азеев, Анелия Андреева кыайыылааҕынан таҕыстылар. Хомойуох иҺин, хаартысканан үлэ аҕыйах киирдэ.
Онтон «Мэрлэн» пьесаҕа кыттыбыт 16 оҕо бары cынньалаҥ киин аатыттан харчынан бириэмийэ, сертификат туттулар.
М.П. Федотова-Нулгынэт төрөөбүтэ 75 сааһыгар анаан В.Д. Лебедев аатынан Орто-Дойдутааҕы орто оскуола салалтата уонна “Удин” оҕо этно-фольклорнай ансаамбыла киэҥ тэрээһиҥҥэ бэлэмнэнии үлэтин ыыталлар.
Суруйда Вера АММОСОВА, Орто-Дойдутааҕы орто оскуола 11 кылааһын үөрэнээччитэ.