Мэҥэ-Хаҥалас улууһугар Маргарита Петрова сырдык кэриэһигэр аналлаах тэрээһиннэр үрдүк таһымнаахтык аастылар. Тэрээһин М.К.Петрова аатын үйэтитэр сыаллаах өрөспүүбүлүкэтээҕи дьаһаллар былааннарыгар киирэн, ордук сэргэхтик уонна далааһыннаахтык ыытылынна. Манна бэлиэтээн эттэххэ, СӨ үөрэҕин уонна наукатын министиэристибэтэ, итиэннэ Мэҥэ-Хаҥалас улууһун үөрэҕин салалтата, үтүө киһи олоҕун кэпсээнин салгыырга, кэнчээри ыччакка туһаайыылаах саҕалааһыннарын тэнитэргэ сыл устата араас хайысханан үлэни сүрүннүөхтэрэ.
Кэнчээри ыччат сайдарын-чэчириирин, сарсыҥҥыта саһарҕаланарын туһугар сүрэхтэрин сылааһын аныыр, дьиҥ патриот баһаатайдар баар буоланнар, төрөөбүт дойдубут киэн туттар дьоннордоох, кэскиллээх, инникилээх…
Мэҥэ-Хаҥалас улууһун үгүс көлүөнэ пионердарын сомоҕолообут, ситиһиигэ кынаттаабыт, бүтүн өрөспүүбүлүкэ киэн туттар пионербаһаатайынан, оҕо общественнай тэрилтэлэрин тэрийээччитинэн, сүбэһитинэн Маргарита Константиновна Петрова буолар. Ытык киһибит горн, барабан доҕуһуоллаах, кыһыл хаалтыс кэрэһиттээх пионерия кэмиттэн саҕалаан аныгы оҕо общественнай тэрилтэлэригэр тиийэ өйөөн, төһөлөөх элбэх лидердэри, активистары үрдүккэ, ситиһиигэ кынаттаабыта буолуой?
Муус устар 3 күнүгэр В.П. Ларионов аатынан Майа орто оскуолатыгар «Үтүө дьыала сомоҕолуур» улуустааҕы оҕо общественнай тэрилтэлэрин куонкуруһа буолан ааста. Тэрээһин СӨ үөрэҕин ситимин бочуоттаах бэтэрээнэ, РФ уопсай үөрэхтээһинин бочуоттаах үлэһитэ, СӨ үөрэҕириитин үтүөлээх үлэһитэ, СӨ государственнай гражданскай сулууспатын туйгуна Петрова М.К. сырдык аатын үйэтитиигэ ананна. Бу күн улуус бастыҥ лидердэрэ, оҕо общественнай тэрилтэлэрэ, салайааччылара мустан араас хайысхаларынан күрэхтэһэн, санаа атастаһан, уопут үллэстэн, үтүө түһүлгэни көҕүлүттэн туттулар.
Тэрээһин үөрүүлээх аһыллыыта пионерия кэмин ырыаларынан, бэтэрээн пионердар маршировкаларынан, оскуола дириэктэрэ Светлана Игнатьева эҕэрдэ тылынан өрө көтөҕүллүүлээхтик саҕаланна. В.П. Ларионов аатынан Майа орто оскуолатын «Дьүрүскэн» ансаамбылын солистара хомус алыптаах дорҕоонунан тэрээһини арчылаатылар. «Тускул» ырыа, үҥкүү ансаамбылын иитиллээчччилэрэ сахалыы ылбаҕай ырыа бастыҥын, тэтимнээх үҥкүү үчүгэйин көрөөччүлэргэ бэлэх ууннулар.
Бэлиэ күн ыҥырыылаах ыалдьыттарынан улуустааҕы үөрэх салалтатын начальнига Ирина Черкашина, СӨ Ил Түмэнин наукаҕа, үөрэхтээһиҥҥэ, култуураҕа, иһитиннэрэр-биллэрэр уонна общественнай тэрилтэ дьыалаларыгар сис кэмитиэтин старшай референа Анна Атласова, СӨ наукатын уонна үөрэҕин министерстибэтин уопсай үөрэхтээһинин отделын кылаабынай исписилииһэ Марианна Платонова, Арктическай оскуола интернатын сэбиэдиссэйэ Лариса Кириллина, Саха сирин оҕолорун общественнай холбоһуктарын сойууһун ресурснай киинин салайааччыта, «Среда роста» консультативно-методическай үөрэхтээһин платформатын толорооччу дириэктэрэ Геннадий Охлопков, «Юные Якутяне» өрөспүүбүлүкэтээҕи ресурснай киинин методиһа, РФ уопсай үөрэхтээһинин бочуоттаах үлэһитэ, СӨ ыччат бэлиитикэтин туйгуна Александра Архипова, Дьокуускай куорат «Айыы кыһата» оскуола дириэктэрэ Лидия Шамаева, Маргарита Константиновна кэргэнэ Иван Петров, төрөппүт кыыһа, СӨ үлэ уонна социальнай көмүскэл министерствотын сүрүннүүр исписсиэлииһэ Туяра Никифорова, уолаттара Ньургун, Айаал Петровтар, бииргэ төрөөбүт балта, Ньурба алын сүһүөх оскуолатын иитэр үлэҕэ дириэктэрин солбуйааччы Октябрина Спиридонова, сиэн балтылара Валентина Афанасьева, Айталина Попова буоллулар.
Тэрээһин бэлиэ түгэнинэн, В.П. Ларионов аатынан Майа орто оскуолатыгар Маргарита Константиновна аатынан кабинет үөрүүлээх арыллыыта буолла. Пионерия кэмиттэн үгүс оҕо сөбүлээн түмсэр 216 кабинетыгар Маргарита Константиновна баһаатайдаах Павлик Морозов аатынан пионерскай дружина сбордара, мунньахтара тэрээһиннээхтик ааһара. Бу историческай тыыннаах, оҕо кутун-сүрүн тутар сырдык кабинет эркинигэр Маргарита Константиновна холобур буолар олоҕун сырдатар, пионерия кэмин көрдөрөр дириҥ ис хоһоонноох истиэндэлэр ыйаннылар, уоттаах-төлөннөөх пионерия аргыстара – горн, барабан экспонат быһыытынан уурулуннулар.
Үөрүүлээх тэрээһиҥҥэ сөп түбэһиннэрэн, Марина Расторгуева салайааччылаах бастыҥ, көхтөөх 3 «а» кылаас Россиятааҕы үөрэнээччилэр хамсааһыннарын кэккэтигэр киирдилэр. Оҕолор аныгы активист килээтибэтин мустубут бар дьон иннигэр этэн, дойду таһымнаах холбоһукка сүрэхтэннилэр. Ыҥырыылаах ыалдьыттар саҥа активистарга үтүө баҕа санааларын анаан туран, Россиятааҕы үөрэнээччилэр хамсааһынын хаалтыһын баайдылар.
Бу күн В.П. Ларионов аатынан Майа орто оскуолатын үөрэнээччилэрэ музей салайааччыта Ирина Маркованы, саха тылын учуутала Изабелла Романованы кытта оҥорбут «С красным галстуком по жизни» диэн М.К. Петрова олоҕун сырдатар ахтыылардаах кинигэлэрин дьиэ кэргэнигэр бэлэх ууннулар.
Күрэх түмүгүнэн, кыайыылаахтар ааттаннылар.
«Учеба актива. Перезагрузка» педагог-тэрийээччилэр ааҕыылара.
Лауреат – Алена Федотовна Рязанская, В.П. Ларионов аатынан Майа орто оскуолата;
- I истиэпэннээх диплом – Виктория Дмитриевна Шестакова, Ф.Г. Охопков аатынан Майа орто оскуолата;
- II истиэпэннээх диплом – Анастасия Яновна Капитонова, Павловскай орто оскуолата., Юлия Николаевна Петрова, Мэлдьэхси орто оскуолата;
- III истиэпэннээх диплом – Федор Федорович Жирков, Майатааҕы лицей, Елена Андреевна Назарова, Гаян Александрович Харлампьев, Аллараа Бэстээх 1 №-дээх оскуолата.
«Делами добрыми едины» оҕо общественнай тэрилтэлэрин күрэҕэ.
- I миэстэ – Аллараа Бэстээх 2 №-дээх орто оскуолата, «Росток» оҕо тэрилтэтэ;
- II миэстэ – Павловскай орто оскуолата, «Стимул» оҕо тэрилтэтэ;
- III миэстэ – Төҥүлү орто оскуолата, «Өркөн» оҕо тэрилтэтэ.
«Моя детская организация» оҕо общественнай тэрилтэлэрин лидердэрин күрэҕэ.
- Лауреат – Аллараа Бэстээх 2 №-дээх орто оскуолатын «Росток» оҕо тэрилтэтин лидерэ Анастасия Пугачева;
- I истиэпэннээх диплом – Төҥүлү орто оскуолатаын «Өркөн» оҕо тэрилтэтин лидерэ Лида Баишева;
- II истиэпэннээх диплом – Дьабыл орто оскуолатын «Дьабыл кэскилэ» лидерэ Руслана Аммосова, Павловскай орто оскуолатын «Стимул» оҕо тэрилтэтин лидерэ Павел Слободчиков;
- II истиэпэннээх диплом – Майатааҕы лицей «Үрдэл» оҕо тэрилтэтин лидерэ Артем Ильин, Балыктаах орто оскуолатын «Тускул» оҕо тэрилтэтин лидерэ Айыллаана Максимова, Ф.Г. Охлопков аатынан Майа орто оскуолатын «Феникс» оҕо тэрилтэтин лидердэрэ Володя Яковлев, Гаврил Устинов.
Лауреаттар Маргарита Константиновна дьиэ кэргэнин аатыттан анал бэлэхтэри туттулар.
Бу курдук, үгүс көлүөнэ тапталлаах пионербаһаатайын, өрөспүүбүлүкэ, улуус үөрэҕин тиһигэр үгүс кылаатын киллэрбит ытык киһибит Маргарита Константиновна сырдык аатын үйэтитэр тэрээһин далааһыннаахтык ыытыллан, кэнчээри ыччаты ситиһиигэ кынаттыыр биир үктэл буолла.
Изабелла Романова,
В.П. Ларионов аатынан Майа орто оскуолатын саха тылын уонна литературатын учуутала