Олунньу 7 күнүгэр биһиги оскуолабытыгар бэрт сэргэх тэрээһин буолан ааста. Саха биллиилээх фольклориһа, этнограба, түмэллэри чинчийээччитэ, археолог, кыраайы үөрэтээччи Дмитрий Иванович Дьячковскай — СэҺэн Боло төрөөбүтэ 120 сылын көрсө Чурапчы улууһун Одьулуун нэһилиэгин баһылыга Людмила Васильевна Ефремова салайааччылаах делегация кэлэн Сэһэн Боло аймахтарын, оскуола коллективын көрсөн, санаа атастаһан бардылар.
Бу күн оруобуна сөп түбэһэн наука күнүн көрүстүбүт. Ол курдук, Сэһэн Боло 1905 с. сэтинньи 8 күнүгэр I Болугур (билиҥҥитэ Одьулуун) сиригэр төрөөбүтэ. Төрөөтүн кытта таайдарыгар I Дьохсоҕон нэһилиэгэр (Маҕарас Амматыгар) Малышевтарга иитиэххэ биэрбиттэр. Чычымах церковно-приходской оскуолатын бүтэрбит. Биһиги дьиэ кэргэммит төрүччүнү үөрэтэммит араас тэрээһиннэргэ кыттыбыппыт. Мин аҕам Андриан Васильевич ол туһунан ыалдьыттарга билиһиннэрбитэ.
Ыалдьыттарбыт биир дойдулаахтарын туһунан биллибэт информацияны Сэһэн Боло аймаҕа Зоя Афанасьевна Малышева дьиэтээҕи архыыбыттан уонна олохтоох түмэл үлэһитэ Мария Платоновна Табунанова хомуйбут матырыйаалларын бэлэхтээбиттэрин ылан, үөрэн, махтанан бардылар.
Сэһэн Боло саха былыргытын, номохтору, норуот тылынан уус-уран айымньытын үйэтитэргэ дьоҥҥо-сэргэҕэ, учуонайдарга бэрт элбэх суолталаах матырыйааллары хаалларбыт.
Маннык тэрээһиннэр биһиэхэ элбэх саҥа билиини биэрэллэр.
Ангелина Малышева, VIII кылаас, Чычымах, Таатта