Амма улууһун Н.Е.Иванов аатынан Бөтүҥ орто агрохайысхалаах оскуолатыгар саҥа опытнай экспериментальнай кылаас аһылынна. Бу туһунан 6 кылаас үөрэнээччитэ Нюргустана Никулина суруйар.
Биһиги, оҕолор, бу тэрээһини, хомойуох иһин, ковид усулуобуйатынан куйаар ситимин нөҥүө эрэ нөҥүө үөрэ-көтө көрбүппүт. Теплица аһыллыытыгар саха тылын учуутала Анастасия Лазарева сахалыы сиэри-туому толордо. Оскуола дириэктэрэ Акулина Ивановаэҕэрдэ тылын эттэ. Экспериментальнай кылаас хаһаайкалара Туяра Рожина уонна Ида Назарова улуус баһылыга Николай Архипов аатыттан «Капельный полив» шланга комплегын туттулар. Олохтоох дьаһалта аатыттан баһылык солбуйааччыта Алексей Стручков история учууталыгар Андрей Гоголевка, прораб Константин Слепцовка уонна Терентий Семеновка Махтал суруктары, итиэннэ өйдөбүнньүк бэлэхтэри, оҕолор үлэлииллэригэр аналлаах бэртээхэй оҕуруокка туттар тэриллэри туттарда.
Биһиги кылаас оҕолоро оскуола арассаадаларыгар (сибэкки арааһа, помидор, оҕурсуу, перец уо.д.а.) уу кутар эбээһинэстээх этибит. Билигин оскуолабытыгар үөрэнэрбит буоллар, ити кылааска тахсан арассаадаларбытын атыылыырга көмөлөһүөх этибит.
Маннык опытнай- экспериментальнай кылаас оҥоһуллубута наһаа үчүгэй, оҕону үлэлииргэ, улахан дьоҥҥо көмөлөһөргө, сибэккини, оҕуруот аһын көрөргө-харайарга үөрэтэр. Маннык киэҥ-куоҥ, элбэх сырдык түннүктээх, кылабачыгас муосталаах тэпэлииссэ-кылааска технология учуутала Туяра Петровна, биология учуутала, производственнай үөрэхтээһин маастара Ида Иннокентьевна салалталарынан үгүс үлэни үлэлиэхпит, элбэх сибэккини, оҕуруот аһын үүннэриэхпит дии саныыбын.
Түгэнинэн туһанан, күүс-көмө буолбут улуус дьаһалтатыгар, улууспут меценатыгар Руслан Еремеевич Федотовка, оскуола эр дьон үлэһиттэригэр, учууталларга махтанабыт! Бу саҥа сырдык, ыраас, аныгылыы тутуулаах опытнай экспериментальнай кылааска элбэх оҕо үөрэнэн, өссө үрдүк ситиһиилэниэхтэрэ, араас хабааннаах чинчийэр үлэлэргэ салгыы кыттан, билиилэрэ-көрүүлэрэ өссө кэҥиэҕэ, элбэх оҕуруот аһын дэлэтэн, сибэкки арааһын үүннэрэн, инникитин Бөтүҥ орто оскуолата өссө үүнүө-сайдыа, чэчириэ!