Тугу эрэ историяҕа хаалларыы, үйэтитии, дьоҥҥо-сэргэҕэ буолан ааспыты мал-сал нөҥүө көрдөрүү, тиэрдии — бу олох биир сүрүн нэһилиэстибэтэ. Киһи тыыннааҕын тухары, айылҕа уонна олох баалларын тухары, кинилэр кэннилэриттэн туох эрэ өйдөбүл хаалар. Оннук өйдөбүл биир көрүҥүнэн коллекциялааһын буолар.
Дьон, киһи тугу баҕарар коллекциялыыр уонна мунньар. Холобур: араас дойдуттан магниттары, муора кытылыттан таастары, көмүс манньыаттары, мэтээллэри уо.д.а. мунньаллар. Инник дьарыктаах дьон буолан ааспыты көрдөрөр, кэпсиир, өйдөтөр, үйэтитэр аналлаахтар. Кинилэртэн биирдэстэрэ — Таатта олохтооҕо Анатолий Григорьевич Мурунов.
Бүгүн, от ыйын 7 күнүгэр, Тааттатааҕы кыраайы үөрэтэр түмэлгэ Анатолий Григорьевич Мурунов коллекциялыыр быыстапкытыгар ыалдьыттаатыбыт. Оттон коллекционер диэн кимий? Коллекционер диэн араас малы-салы, өйдөбүнньүгү хомуйар, мунньар киһи. Таатта улууһугар Анатолий Григорьевич Мурунов 1976 сылтан күрэс эйгэтигэр коллекционер. Кини «Манчаары оонньууларын» кыайыылаахтарын, кинилэр мэтээллэрин, күрэс ыытыллыбыт сирдэрин испииһэгин, Таатта спортсменнарын туһунан кинигэлэри, анал паапкалары, значоктары, күрэсчиттэр буклеттарын уонна да атыны коллекциялыыр эбит.
Анатолий Григорьевич Мурунов — дэгит өрүттээх киһи. Ол курдук, Таатта улууһун бочуотун кинигэтигэр киирбитэ, нуорматын 5 толорбут күрэс маастарыгар хандьыдаат. Ону таһынан, кини күрэс бэтэрээнэ, Таатта улууһун 11 төгүллээх муҥутуур кыайыылааҕа, инженер, общественнай диэйэтэл, коллекционер, экономист уонна салайааччы. Арассыйа суруналыыстарын сойууһун чилиэнэ, хас да кинигэ ааптара. 1976 сыллаахтан күрэс эйгэтин сырдатар, «Манчаары оонньууларын» коллекциялыыр.
Коллекционер муспут малын, хаартыскаларын, түмпүт араас мэтээллэрин көрөр олус хайҕабыллаах. Элбэх үлэ, дьону кытары алтыһыы, сыра, баҕа — барыта баара көстөр. Онон биһиги, эдэр кэрэспэдьиэннэр, Ытык Таатта сиригэр үктэммит маҥнайгы күммүт билсиһиитэ маннык ааспытыттан астынныбыт, долгуйдубут. Күрэс төрүт көрүҥнэригэр «Манчаары оонньууларын» туһунан бу тэриллибит быыстапкаттан элбэх саҥаны уонна интэриэһинэйи билэн-көрөн тарҕастыбыт. Коллекционер дьон — историяны илдьэ сылдьар, ону тиэрдэр ураты дьарыктаах дьон.
Сиһилии видео-матырыйаалбытыгар көрүҥ:
Мария Сибирякова, Александра Иванова суруйуулара, Алексей Саввин куолас таҥыыта, Дарина Иванова видеоҕа устуута, «Кэскил» оҕо пресс-киинин эдэр кэрэспэдьиэннэрэ