Горнай хамаандатыгар бастакы кыһыл көмүс мэтээли традиционнай оҕунан ытааччылар аҕаллылар. Ол курдук күрэхтэһии биир кырачаан кыттааччыта Розана Слепцова оҕолорго чемпион үрдүк аатын ылла. Ытыылар кэннэ, комментатор: “Бастакы миэстэни ылла Розана Слепцова, Горнай!”, – диэн биллэрээтин кытары, күрэхтэһии дьоруойугар аҕата, тренерэ, спортсменнар сүүрэн тиийэн бастакынан эҕэрдэлээтилэр. Элбэх дьон быыһыгар кырачаан кыыс туох буолбутун өйдөөбөккө эмиэ да ытыан, эмиэ да үөрүөн билбэккэ мунаахсыйан турда.
Күрэхтэһии кэнниттэн Манчаары оонньуутун кырачаан дьоруойа Розана бэйэтин санаатын кытта үллэстэр:
– Мин Сэмэн Данилов аатынан Бэрдьигэстээх орто оскуолатыгар үөрэнэбин. IV кылааһы бүтэрдим. Кылааһым салайааччыта Марианна Николаева. Бэрдьигэстээххэ Дьокуускайтан көһөн кэлбиппит. Оҕунан ытыынан иккис сылын дьарыктанабын. Тренерим Зинаида Платонова.
Мин бастаан олус долгуйбутум. Ытар кэммэр тренерим сүбэтэ-амата көмөлөстө. Кыайдыҥ диэбиттэригэр хайдах эрэ итэҕэйбэтэҕим. Билиҥҥи турукпун кыайан тириэрдибэппин, туох диэхпин билбэппин.
Оҕолорго иккис миэстэни Дьокуускайтан Аина Егорова, үсүһү Тааттаттан Руслана Тарбахова ыллылар. Бэтэрээн дьахталларга Чурапчыттан Эльвира Ефимова спорт бу көрүҥэр бастакынан СӨ спордун маастар нуорматын түмүгүн ылары ситистэ.
Эҕэрдэлиибит!
«Үлэ күүһэ» хаһыат, Горнай улууһа.