А.Е. Мординов аатынан Тааттатааҕы лиссиэйгэ күрэс төрүт көрүҥнэригэр XXII «Манчаары оонньууларыгар» сахалыы тылы-өһү туһаныыга аналлаах семинар буолан ааста. Манна суруналыыстар, блогердар, судьуйалар уонна биһиги, «Кэскил» оҕо пресс-киинин эдэр кэрэспиэдьиэннэрэ кыттыыны ыллыбыт.
Семинар үлэтин суруналыыс Владислав Коротов иилээн-саҕалаан ыытта. Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта Сергей Местников, Таатта улууһун баһылыга Айаал Бурцев, күрэс уонна эт-сиин култууратын миниистирэ Леонид Спиридонов, Манчаары Баһылай аатынан Саха сирин төрүт көрүҥнэрин сайыннарар өрөспүүбүлүкэтээҕи киин дириэктэрэ Геннадий Васильев, «Саха» иһитиннэрэр-көрдөрөр хампаанньа телевидениетын дириэктэрэ Олег Колесов «Мачнаарв оонньууларын» сырдатыыга сахалыы тиэрминнэри туһаныы туһунан санааларын атастылар.
Сергей Васильевич Местников эппитин курдук, Саха Өрөспүүбүлүкэтин Бырабыыталыстыбатыгар саха тылын тиэрминнэрин өрөспүүбүлүкэтээҕи хамыыһыйата үлэлиир. Сүрүн сыала-соруга –төрөөбүт тылбытын сайыннарыы, туттуллар эйгэтин кэҥэтии.
– «Манчаары оонньуулара» ыытылларынан сибээстээн, ситимнээн спорт эйгэтигэр туттуллар тиэрминнэри сахатытыыга улахан болҕомтобутун уурдубут. Ааспыт сылларга спорт национальнай көрүҥнэригэр «Манчаары оонньуулара» спартакиада диир эбит буоллахпытына, билигин күрэс төрүт көрүҥнэригэр «Манчаары оонньуулара» диэн саха тылын тиэрминнэрин өрөспүүбүлүкэтээҕи хамыыһыйатынан бигэргэммитэ, – диэн этэр С.В. Местников.
Семинарга эппиттэрин курдук, «Манчаары оонньуулара» диэн аҥардас күрэхтэһии эрэ буолбакка, бу – биһиги төрүт үгэспит, өйбүт-санаабыт, тылбыт-өспүт, биир бастакынан төрөөбүт тылбытын харыстыырга биир сүрүн тирэхпит.
Суруналыыс Владислав Коротов: «Тыл диэн тыыннаах организм. Дьон-сэргэ сахалыы күрэс (спорт) эйгэтигэр киирбит тыллары хайдах ылынан бэйэтин тылыгар-өһүгэр «олордон» туһанарыттан улахан тутутулуктаах», – диэн этэн туран иһитиннэрэр-биллэрэр эйгэ (ИБЭ) үлэһиттэригэр анаан оҥоһуллубут күрэс нууччалыы-сахалыы кылгас тылдьытын билиһиннэрдэ.
Бу тылдьыт «Манчаары оонньууларын» сырдатыыга анаан оҥоһуллубут уонна Саха өрөспүүбүлүкэтин Бырабыыталыстыбатыгар саха тылын тиэрминнэрин өрөспүүбүлүкэтээҕи хамыыһыйатын мунньаҕын 13 №-дээх боротокуолунан бигэргэммит.
Семинарга оҕо пресс-киинин юнкора, Чурапчы гимназиятын үөрэнээччитэ Маша Сибирякова бэйэтин санаатын үллэһиннэ: «Сахалыы тылбытын-өспүтүн харыстыырбыт наадалаах. Онуоха сөптөөх хамсааһыннар тахсан, үлэ ыытылларын эдэр кэрэспэдьиэннэр өйүүбүт уонна суруйар үлэбитигэр сыһыаран туһаныахтаахпыт диэн санааҕа кэллим».
Онтон мин тус бэйэм санаабын эттэхпинэ, ордук СМИ (средство массовой информации) диэн өйдөбүлү иһитиннэрэр-биллэрэр эйгэ (ИБЭ) диэн сахалыы тылбаастаммытын чугастык ылынным.
Бу бигэргэммит тыллартан кылгас тылдьыты манна көрүөххүтүн сөп.
Алёна ТАППЫРОВА, VIII кылаас,
В.И. Ленин аатынан Уолба орто оскуолата, Таатта,
«Кэскил» оҕо пресс-киинин эдкора