Бэс ыйын 22 күнүгэр «Сахамедиа» пресс-киинигэр «Манчаары оонньуулара» спорт национальнай көрүҥнэригэр өрөспүүбүлүкэтээҕи спартакиада саҥа информационнай портала сүрэхтэннэ.
Аан тылы РФ, СӨ физическэй культуратын үтүөлээх үлэһитэ, Д.П.Коркин аатынан государственнай бириэмийэ лауреата, Баһылай Манчаары аатынан саха успуордун национальнай көрүҥнэригэр өрөспүүбүлүкэтээҕи спартакиадатын саҕалааччыта, олохтооччута Афанасий Егорович Алексеев ылла.
СӨ физическэй культуратын уонна спордун миниистирэ Иннокентий Юрьевич Григорьев быйылгы XXI-с Манчаары оонньууларыгар 174 мэтээл комплега 11 спорт национальнай көрүҥнэригэр оонньонорун эттэ. Барыта 6560-ча киһи кыттыыны ылара күүтүллэр, олор истэригэр 1850 спортсмен, 250 судьуйа, 175 волонтер.
Саҥа сайт ООО «АртСтоун» диэн биллэр-көстөр тэрилтэ көмөтүнэн уонна сыратынан оҥоһулунна. Бу күн сайт оҥорооччуларын аатыттан ООО «АртСтоун» генеральнай дириэктэрэ Михаил Евгеньевич Пахомчик уонна «Лаймбренд» партнер салайааччыта Алена Николаевна Леонтьева быһа сибээскэ холбонон таҕыстылар.
«Манчаары оонньуулара» спорт национальнай көрүҥнэригэр өрөспүүбүлүкэтээҕи спартакиада официальнай сайтын арыйарга РФ, СӨ физическэй культуратын үтүөлээх үлэһитэ А.Е.Алексеев уонна спорт миниистирэ И.Ю.Григорьев ыҥырылыннылар.
Салгыы портал үөрүүлээх арыллыытын кэннэ Манчаары Баһылай аатынан национальнай көрүҥнэр өрөспүүбүлүкэтээҕи киинин дириэктэрэ Гаврил Михайлович Мохначевскай саҥа сайт туһунан суруналыыстарга, СМИ үлэһиттэригэр билиһиннэрдэ.
Сайтка урукку күрэхтэһиилэр хаартыскаларын архива киирбитэ сонун уонна сэргэх буолла. Ааҕааччыларбыт ону сиһилии Официальный сайт | Игры Манчаары 2021 (manchaarygames.ru) киирэн көрүөххүтүн сөп.
Маны таһынан эҕэрдэ тылы уонна бэйэлэрин санааларын спортивнай общественность уонна спорт бэтэрээннэрин ааттарыттан спортивнай музейдар общественнай Сэбиэттэрин бэрэссэдээтэлэ Михаил Егорович Друзьянов, «Спорт Якутии» интернет таһаарыы кылаабынай редактора Александр Васильевич Посельскай эттилэр.
Санатан этэр эбит буоллахха, XXI-с Манчаары оонньуулара Горнай улууһугар Бэрдигэстээх нэһилиэгэр от ыйын 6-11 күннэригэр ыытыллыаҕа.
Түөрт сылга биирдэ буолар саха омугун оонньууларын киэҥ эйгэҕэ таһаарар, саха спортсменнарын биир түһүлгэҕэ түмэр бастыҥ спортивнай тэрээһини көтүппэккитигэр уонна саҥа арыллыбыт Официальный сайт | Игры Манчаары 2021 (manchaarygames.ru) сайтка быһа эфиргэ спартакиада буолар күнүгэр холбоноргутугар ыҥырабыт.
Маны таһынан биһиги бэйэбит сайпытыгар спартакиада хаамыытын билиһиннэрэ туруохпут, онон биһигини кытары бииргэ буолуҥ!
Бэлэмнээтэ Анна СЛЕПЦОВА.
Хаартыскалар Интернет ситимиттэн ылыныллылар.
1
Махтал, сырдаппыккытыгар! Кэтэьэбит