«Манчаарыы оонньуулара» успуорт национальнай көрүҥнэригэр ыытыллар XXII Спартакиада Таатта улууһугар от ыйын 7-12 күннэригэр ыытыллар. «Манчаары оонньуулара» Спартакиаданы бүтүн Саха сирин олохтоохторо бары күүтэллэр.
Н.Е. Мординов-Амма Аччыгыйа аатынан «Кэскил» оҕо бэчээтин кыһатын эдкордара өрөспүүбүлүкэтээҕи оҕо пресс-киинигэр үлэлиэхтэрэ. Манна араас улуустан, оннооҕор Эбээн-Бытантай национальнай улууһуттан тиийэ, уон икки юнкор ыҥырыллан, хайыы-үйэ билигин нэһилиэктэрин, улуустарын спортсменнарын туһунан сырдата олороллор, маастарыстыбаларын үрдэтэллэр.
Сардаана Иннокентьевна Тарасова Таатта улууһун оҕо спортивнай оскуолатын сүүрүүгэ уонна гиирэ спордугар тренерынан үлэлиир. Кини спордунан 2012 сылтан дьарыктанан саҕалаабыта. Сүүрүүгэ аан маҥнайгы тренерэ Иванов Евгений Иннокентьевич буолар. Билигин, кини туйаҕын хатаран, сүүрүү тренерынан иккис сылын үлэлии сылдьар. Онтон 2016 сыллаахха Иннокентий Иванович диэн тренер кэлэн, гиирэ спордун көрүҥүн сырдатан, күн бүгүҥҥэ диэри илиититтэн түһэрбэккэ дьарыктанан, Тааттаҕа буолаары турар «Манчаары оонньууларыгар» путёвка ылан, күүстээх дьарыгы ааһа сылдьар.
Таатта хамаандата үөрэнээччилэр Спартакиадаларыгар
Сардаана Иннокентьевна төрөөбүт, улааппыт дойдутугар «Манчаары оонньуулара» буоларыттан олус киэн туттар, билигин баар санаатын ууран, этэргэ дылы утуйарыгар «Манчаары оонньууларынан» утуйар, сарсыарда уһуктарыгар Спартакиадаҕа бэлэмнэнииттэн күнэ саҕаланар.
Бу соторутааҕыта кини Улан-Удэ куоракка тиийэ сбор ааһан, дьарыга ыһыктыбакка бара турар. «Путёвка ылан баран, дьарык тосту уларыйда. Бурят омук спортсменнарыттан элбэххэ үөрэнэн, туһунан программа оҥостон, дьарык таһыма сүрдээҕин улаатта», — диэн дьарыгын туһунан үллэстэр.
Быйыл «Манчаары оонньууларыгар» эдэр тренербыт иккис төгүлүн кыттыыны ылар. 2021 сыллаахха Горнай улууһугар буолбут XXl Спартакиадаҕа кыттан турардаах.
«Дьон саҥатын истибэккэ, бэйэҥ туруоруммут сыалгын-соруккун ситиһэргэр дьулуһуоххун наада. Хайа баҕарар спортсмеҥҥа дисциплина олоҕор инники күөҥҥэ сылдьыахтаах», — диэн кини этэр.
— Хас биирдии киһи, спортсмен эрэ буолбакка, ньоҕой буолуохтаах. Олох олороруҥ тухары ыарахаттар көстөллөр, спортсмен буоллаххына, күрэх ыарахаттара, дьарык ыарахаттара, эчэйиилэр бааллар. Ньоҕойдоһон, ол аата, бастатан туран бэйэҕин кыайдаххына, эн иннигэр элбэх кыайыылар арыллыахтара, — диэн тренер Сардаана Тарасова эдэр спорсменнарга бэйэтин санаатын тиэрдэр.
Тренербытыгар «Манчаары оонньууларыгар» кыайыы өрөгөйүн, ситиһиини баҕарабыт!
Яна ГУЗАИРОВА, «Кэскил» оҕо-пресс киинин эдкора, Таатта, Харбалаах.