«Манчаарыы оонньуулара» успуорт национальнай көрүҥнэрин XXII Спартакиадатын «Кэскил» оҕо пресс-киинин эдкордара суруйаллар.
«Манчаары оонньууларыгар» Таатта Уолбатыттан эдэр кэскиллээх мадьыны Ариан Неустроев кыттарга бэлэмнэнэр. Кини быйыл 10 кылааһы бүтэрдэ, оскуолабытыгар «Ил Ситим» оҕо общественнай тэрилтэтин бэрэссэдээтэлэ. Мин Ариантан аҕыйах ыйытыыбар хоруйдууругар көрдөстүм.
— XXII төгүлүн ыытыллар «Манчаары оонньуулара» Спартакиадаҕа бэлэмнэнии хайдах баран иһэрий?
— «Манчаары оонньууларыгар» мин мас тардыһыыга кыттабын. Мин санаабар бэлэмнэниим үчүгэй, «Спортивные якутяне» Саха Өрөспүүбүлүкэтин үөрэнээччилэрин Спартакиадатын сборугар эрчиллибитим, «Манчаары оонньууларын» сборугар өссө дьарыктаныаҕым.
— Успуорка туох улахан ситиһиилэрдээххиний?
— Иккитэ Арассыыйаҕа призердаабытым: Нальчикка уонна Суздальга күрэхтэспитим, өссө Анапаҕа турнирга холоммутум.
— «Манчаары оонньууларыттан» тугу күүтэҕин?
— Кылгастык эттэхпинэ, бу Спартакиадаттан тыҥааһыннаах киирсиилэри кэтэһэбин уонна онтон «Манчаары оонньуулара» улахан бырааһынньык буоллаҕа дии, бэйэтэ туспа биир бэлиэ түгэн. Онон бары бииргэ биир норуот буоларбытын көрдөрөр туһугар түмсүүлээхтик, иллээхтик сылдьарбытын эрэнэ күүтэбин.
Алёна ТАППЫРОВА, В.И. Ленин аатынан Уолба орто оскуолатын VII кылааһын үөрэнээччитэ, Уолба, Таатта.
keskil14.ru