В. П. Ларионов аатынан Майа орто оскуолатын 9 «А» кылааһын үөрэнээччитэ Эрсан Сыроватскай Владивосток куоракка ыытыллыбыт Бүтүн Арассыыйатааҕы «Приморская весна» чэпчэки атлетика күрэхтэһиитигэр боруонса мэтээли ылары ситистэ.
Күрэххэ Камчатка, Соҕурууҥҥу Сахалинск, Приморскай, Хабаровскай кыраайдартан, Амурскай уобаластан, Саха өрөспүүбүлүкэтиттэн бастыҥ спортсменнар күөн көрүстүлэр. Эрсан 3 килэмиэтири сүүрүүгэ үһүс кэлэн кыайыы өрөгөйүн биллэ. Тириэньэрэ — Дмитрий Петрович Павлов.
Киэҥ хабааннаах күрэххэ Мэҥэ Хаҥалас улууһуттан Хара орто оскуолатын үөрэнээччитэ Семен Бурнашов эмиэ кытынна. Тириэньэрэ — Лариса Иннокентьевна Семенова. Кини өрөспүүбүлүкэ хамаандатын састаабыгар 4х400 м эстэпиэтэҕэ сүүрэн бастакы миэстэ буолла. Онтон Бүтэйдээх орто оскуолатын үөрэнээччитэ Саша Федоров 4х400 м эстэпиэтэҕэ 3 миэстэни ылла. Тириэньэрэ — Дмитрий Петрович Павлов.
Эрсан Сыроватскай спордунан дьарыктаныы туһунан санаатын бу курдук үллэстэр:
— Мин сүүрүүнэн оҕо-ыччат спордун оскуолатыгар 8-с кылаастан дьарыктанабын. Сүүрүү киһи доруобуйатыгар олус туһалаах, тулуурдаах, дьулуурдаах буоларга үөрэтэр. Быйыл 2005-06 сыл төрүөх оҕолорго аналлаах өрөспүүбүлүкэ первенствотыгар 1 миэстэ буолбутум. «Приморская весна» күрэххэ күүстээх, дьарыктаах спортсменнары кытта күөн көрүстүбүт. Саха сириттэн уопсайа 39 сүүрүүк кытынна. Өрөспүүбүлүкэм чиэһин ситиһиилээхтик көмүскээбиппиттэн үөрэбин. Майа нэһилиэгин олохтоох дьаһалтатыгар, оскуолабар, тириэньэрбэр Дмитрий Петровичка ыраах айаҥҥа ситиһиилээхтик сылдьан кэлэрбэр күүс-көмө, өйөбүл буолбуттарыгар махталбын тиэрдэбин!
«Мэҥэбил» пресс-киин, В. П. Ларионов аатынан Майа орто оскуолата.