Алтынньы 24-25 күннэригэр В.П. Ларионов аатынан Майа орто оскуолатыгар 5-11 кылаас уолаттарыгар аналлаах сылын аайы ыытыллар “Биир күн — аармыйаҕа” диэн бастакы чиэппэри түмүктүүр тэрээһин буолан ааста. Бу тэрээһин сүрүн сыала-соруга диэн уол оҕону эт-хаан өттүнэн бэлэмнээһин, дойдуга бэриниилээх буолуу тыынын иҥэрии буолар.
Байыаннай сбор маннык бэрээдэгинэн барда:
Бастакы күҥҥэ оскуолабыт эр дьоно уолаттары 6 ротаҕа арааран, байыаннай дьарыктары ыыттылар. Ол курдук, стройунан хаамыы, дойдубут историятыттан лекция истии, уопсай эт-хаан туругар дьарыктар, противогаз кэтэргэ үөрэнии (РХБЗ), аптамааты ыһыы-хомуйуу, буулдьанан ытыы (огневая подготовка) буолан аастылар. Киэһэ өттүгэр байыаннай сбор арыллыыта буолла. Уолаттары МВД пенсионера, Чечня сэриитин, анал байыанньай дьайыы кыттыылаҕа, «Хорсунун иһин» уордьан (1996 с.) хаһаайына Петр Владимирович Ксенофонтов кэлэн эҕэрдэлээтэ. Киэһээҥҥи аһылык кэннэ Петр Владимировичтыын аһаҕас кэпсэтии буолла. Кини бэйэтин уопутун, сырыыларын кэпсээтэ, сүбэ-ама биэрдэ, оттон уолаттар интэриэһиргиир боппуруостарыгар хоруй ыллылар. Бастакы күн зарница оонньуунан түмүктэнэн, оҕолорбут байыаннайдыы утуйар мөһөөччүктэригэр нухарыйдылар.
Иккис күн эти-хааны эрчийэр сэрээккэттэн саҕаланна. Бастакы күҥҥэ уолаттар араас хайысханан дьарыктаммыт, үөрэммит эбит буоллахтарына, иккис күн роталарынан уонна биирдиилээн байыаннай күрэхтэр буоллулар. Күрэх кэннэ наҕараадалааһын сиэрэ-туома ыытылынна, уолаттар мэтээлинэн уонна грамотанан наҕараадаланнылар.
Маннык курдук интэриэһинэй күрэхтэр ыытыллаллара олус туһалаах дии саныыбын. Эт-сиин өттүнэн сайдарга, барытыгар бэлэмнээх буоларга үөрэтэллэр. Үөрэнээччи оскуола кэмиттэн маннык сатабылларга үөрэнэн бардаҕына, дойду патриота буола улаатар уонна сайдар.
Сиһилии тэттик видео-матырыйаалбытыгар көрүҥ:
Суруйда Лилиана Слепцова, X «б» үөрэнээччитэ,
«Мэҥэбил» пресс киин, Майа, Мэҥэ Хаҥалас