Бу күннэргэ В.П. Ларионов аатынан Майа агро-оскуолатын инкубаторыгар бройлернай чоппуускалар таҕыстылар. Ол туһунан «Мэҥэбил» пресс-киин иһитиннэрэр.
Кэнчээри ыччаты үлэнэн иитэр оскуола агро-булуогар үлэ ыйдарынан аттарыллан күөстүү оргуйар. Олунньу ыйга оскуола инкубаторыгар көҕөн боруодалаах кустар күн сирин көрбүттэрэ.
Анал комбикормунан уонна үөрэнээччилэр үүннэрэр битэмииннээх күөх отторунан аһылыктанан номнуо бороохтуйбуттар. Самаан сайын буолан, оскуола Тураахтаах алааһыгар сайылыы тахсалларын күүтэллэр.
Кулун тутар ыйга үөрэнээччилэр агро-булуокка киирэллэрэ-тахсаллара үксээтэ. Ый саҕаланыытыгар инкубаторга укпут кууруссаларын сымыытыттан кырачаан бэйэлээх чоппуускалар тахсыбыттар.
Кус сымыыта инкубаторга 27-28 күн сытан тэстэр эбит буоллаҕына, бройлернай куурусса сымыыта лоп курдук 21 күнүнэн ситэн, сап-саһархай көп түүлээх кырачаан чоппуускалар тахсаллар.
Үөрэнээччилэр чоппуускалары көрөргө-истэргэ көмөлөһөллөр, сымыыттары инкубатордаан таһаарыы туһунан чинчийэр үлэлэри ыыталлар.
«Мэҥэбил» пресс-киин,
Мэҥэ Хаҥалас улууһа.