Олунньу 14 күнэ Майа нэһилиэгэр ураты суолталаах күнүнэн бэлиэтэннэ. Бу күн СӨ Бырабыыталыстыбатын отчуота буолан ааста.
Отчуокка СӨ экэниэмикэҕэ миниистирэ Петр Попов салайааччылаах бырабыыталыстыба бөлөҕө кэлэн үлэлээтэ. Дьокуускайтан аналлаах дэлэгээссийэни Майа олохтоохторо үөрэ-көтө көрүстүлэр.
Д.Ф. Ходулов аатынан култуура киинигэр буолбут тэрээһиҥҥэ нэһилиэк баһылыга Алексей Неустроев уонна улуус баһылыга Дмитрий Тихонов кыттыыны ыллылар.
СӨ Бырабыыталыстыбатын отчуотун кэмигэр Петр Попов ааспыт сыллааҕы үлэ түмүктэрин билиһиннэрдэ, нэһилиэк олохтоохторун интэриэһиргэтэр ыйытыыларыгар хоруйдаата. Олохтоохтор туһаайан биэрбит этиилэрэ уонна санаалара салгыы үлэҕэ киирэллэрэ былааннанар.
Отчуок түмүгүнэн Майа нэһилиэгин олохтоохторо Бырабыыталыстыба үлэтин сэргээтилэр уонна инникитин даҕаны ситимнээхтик үлэлииргэ бэлэмнэрин биллэрдилэр.
Лилиана ПОПОВА, IX “ A” кылаас,
Ф.Г. Охлопков аатынан Майа орто оскуолата, Мэҥэ Хаҥалас