Мин Саҥа дьыл өрөбүллэригэр keskil14.ru саайка Екатерина Петровна Чехордуна «Олоҕум тыына – олоҥхо» диэн интервьютун аахтым https://keskil14.ru/e-p-chehorduna-olo-um-tyyna-olo-ho/
Кини – РСФСР үөрэҕириитин туйгуна, Саха Өрөспүүбүлүкэтин үтүөлээх учуутала, педагогическай наука кандидата, “Гражданскай килбиэн” бэлиэ туһааннааҕа, Арассыыйа бочуоттаах попечителэ, Таатта улууһун уонна Тыараһа нэһилиэгин Бочуоттаах олохтооҕо, меценат, Учууталлар учууталлара, этнопедагог, “Эркээйи эргиирэ” бырагыраама ааптарскай бөлөҕүн кыттыылааҕа, «Арылы Кустук» СЭДИП технологиянан үлэлиир уһуйааннар ситимнэрин научнай салайааччыта, “Өксөкүлээх үөрэҕэ” бырагыраама ааптара, “Өксөкү сиэннэрэ”, “Өксөкү сиэннэрэ. Чы-чып-чаап” бырагыраамалар научнай сүбэһитэ.
Бу интервьюга мин Екатерина Петровна оҕо сааһын, дьиэ кэргэнин туһунан кэпсээбитин сөбүлээтим. Кини төрөппүттэрэ оҕону кыра эрдэҕиттэн улахан киһи курдук көрөллөрө, тэҥҥэ кэпсэтэллэрэ олус сөптөөх иитии дии санаатым. Бу ньыма оҕо бэйэтин эппиэтинэстээхтик санаммытыгар, олоххо туруктаах буоларыгар көмөлөспүт. «Оҕо мэниктээн улаатыахтаах» диэн иитии оҕо саас дьолун уонна көҥүлүн көрдөрөр.
Холкуос олоҕо төһө да ыараханын үрдүнэн, ийэлээх аҕата күнү быһа сынньалаҥа суох үлэлииллэрэ ол кэмнээҕи дьон дьиҥнээх патриотизмын уонна тулуурдаах буолууларын туоһулуур.
Сир-дойду ааттара – Тайах ойуур, Абааһылаах алаас, Таатта эбэ – ахтыыны өссө тыыннаах оҥороллор курдук. Оҕо аймах айылҕаны кытта биир буолан, ханнык да кутталтан толлубакка (холобур, Абааһылаах алаас) көҥүллүк оонньоон улааппыттара – дьиҥнээх сахалыы олох көстүүтэ диэн көрдүм.
Екатерина Петровна саха дэриэбинэтигэр ааспыт оҕо сааһын туһунан ахтыыта олус уйаҕас уонна истиҥ. Манна бэйэни салайыныы, айылҕаҕа убаастабыллаах сыһыан тыына көстөр.
Бу интервью ааспыт кэм сылаас тыыннаах, олус дириҥ ис хоһоонноох дии санаатым. Екатерина Петровна төрөппүттэрин, төрөөбүт-үөскээбит алааһын, оҕо сааһын олуһун диэн убаастыыра, ахтара көстөр.
Екатерина Петровна Чехордунаҕа саҥа үүммүт 2026 сылынан истиҥ эҕэрдэбин тиэрдэбин. Оҕо сааһын дьоллоох кэмин туһунан наһаа үчүгэйдик кэпсээбиккэр, дириҥ өйгүттэн-санааҕыттан үллэстибиккэр махтанабын.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан