Ньурба улууһун Маар орто оскуолатыгар саҥа үөрэх дьылыгар оруобуна 100 оҕо үөрэнэр, оскуолабытын үс оҕо бүтэриэҕэ, онтон билии киэҥ аартыгын 12 оҕо арыйар.
Балаҕан ыйын 1 күнүгэр үөрүүлээх линейкаҕа учууталлары, үөрэнээччилэри, төрөппүттэри Маар орто оскуолатын дириэктэрэ А.И. Никифоров, Түмүк нэһилиэгин баһылыга Д.Н. Егоров, Ньурба улууһун үөрэх управлениетын бырайыактыыр методическай салаа салайааччыта С.И. Васильева эҕэрдэлээтилэр. Ньурба оройуонун баһылыгын аатыттан оскуола аан маҥнай боруогун атыллаабыт кырачаан үөрэнээччилэригэр үгэскэ кубулуйбут бэлэҕи М.М. Пан туттарда.
Быйылгы үөрэх дьылыгар оскуолаҕа өр сылларга үлэлээбит учууталлары: 40 сыл стажтаах математикабыт учуутала Н.А. Мухина, алын сүһүөх учуутала Д.С. Егоров 30 сылынан, математика учуутала А.А. Иванов 25 сылынан оскуола профкомун салайааччыта З.В. Тимофеева эҕэрдэлээтэ.
Быйылгы үөрэх дьылыгар биһиги оскуолабытыгар саҥа сүүрээн — бизнес уонна урбаан кылааһынан 5 кылаас ааттанна.
Маар орто оскуолатын иитэр-үөрэтэр үлэҕэ дириэктэри солбуйааччы А.В. Трофимова:
— Быйылгы үөрэх дьылыгар саҥа сүүрээн ирдэбилинэн Маар орто оскуолатыгар 5 кылаас «Бизнес, предпринимательство кылааha» диэн аaттаныа. Кыра кылаастан профориентацияланыы, урбаан, реклама эйгэтигэр сыстыы буолар. Оҕолор улаатан истэхтэринэ экономика, быраап сүрүннэрин үөрэтиэхтэрэ, урбаан эйгэтин үлэhиттэрин кытта алтыҺан бизнес-трениннарга сылдьыахтара, араас бырайыакка кыттыахтара. Оскуоланы бүтэрэллэригэр дьоҕус тэрилтэ тэринэр кыахтаах дьон буолан тахсыахтара диэн сыал-сорук турар. Үөрэх таhынан дьарыктарга финансовай грамотнаhы сөпкө туһана үөрэниэхтэрэ, тэрээhиннэргэ такайыллыахтара. Бу кылааска 9 оҕо киирдэ. Билии күнүгэр кинилэргэ фирменнай кылаас бэлиэтэ значок, сэмэй бэлэхтэр туттарылыннылар. Кылааһы үөрүүлээхтик Ньурба оройуонун баhылыгын солбуйааччы Михаил Маркович Пан aрыйда. Ньурбатааҕы «Бизнес инкубаторы» кытта ыкса үлэлэһиэхпит диэн кэпсэтии барда.
дьиэ кэргэнэ Слепцовтар
Үөрэх дьыла саҕаламмытын туоһулуур маҥнайгы алтан чуорааны тыаһатар чиэс оскуолабыт выпускниктарыгар Антонова Алинаҕа, Васильев Тихоҥҥа, маҥнайгы кылаас үөрэнээччитигэр Албутова Даринаҕа уонна Захаров Витяҕа тигистэ.
Биир үөрүүлээх сонуммутунан 2024-2025 сс. оскуолабыт выпускниктара бары 100% баҕарбыт үөрэхтэригэр туттарсан киирдилэр. Маны таһынан, 9 кылаас кэннэ түөрт оҕо орто үөрэххэ туттарсан устудьуон аатын сүктүлэр. Бэлиэтээн этиэ этибит, оскуолабыт, «Кэскил» оҕо бэчээтин кыһатын юнкордара Авдей Неустроев А.Д. Макарова аатынан култуура уонна искусство «Видео и фотография» салаатыгар, Сайыына Тобонова АГИКИ «Графика, искусство» салаатыгар киирэн баҕа санааларын толордулар.
Оскуолабыт выпускниктарын, оскуола үөрэнээччилэри, учууталлары, оскуола бары үлэhиттэрин уонна төрөппүттэри Билии күнүнэн, саҥа үөрэх дьыла саҕаламмытынан эҕэрдэлиибит!
Оҕолорго туйгун үөрэҕи, элбэх билиини, үтүө доҕоттору, үрдүк ситиhиилээх, айымньылаах үөрэх дьылын баҕарабыт!
Маар орто оскуооатын «Юла» медиакиинэ, Ньурба.
keskil14.ru