Муома оройуонун Улахан Чыыстай төрүт сэлиэнньэтигэр уонна «Мааҕыр» ыстаадаҕа Саха сиринээҕи «Юные оленеводы» оҕо уопсастыбаннай хамсааһынын иһинэн үлэлиир элбэх хайысханы хабар “Арктическай вклад” бырайыак уонна «Православная инициатива-2025» грантовай өйөбүл биир сүрүн үлэтинэн төрүт көрүҥнэргэ күрэх ыытыыта буолла.
Ол курдук, “Мааҕыр” ыстаада табаһыттарыгар, үлэһиттэригэр, ыстаада иһинэн үлэлиир «Оралчимна» сайыҥҥы лааҕыр оҕолоругар 4 көрүҥҥэ күрэхтэһии буолан ааста: улахан дьоҥҥо уонна оҕолорго уучаҕы миинэн сүүрдүү, улахан дьоҥҥо аты миинэн сүүрдүү, бэтэрээннэргэ уонна эдэр оҕолорго туспа 100 м сүүрүү уонна бүтэһик көрүҥүнэн маамык быраҕыыта буоллулар.
Күн-дьыл туруга мөлтөҕүн да иһин, ардаҕы ардах диэбэккэ кыттааччылар сүрдээх тыҥааһыннаах киирсиилэри, төһө бэлэмнээхтэрин көрдөрдүлэр, дьоҥҥо-сэргэҕэ умнуллубат күнү бэлэхтээтилэр.
Күрэхтэһии түмүгүнэн, дьүүллүүр сүбэ 1, 2, 3 миэстэлэри быһаарда, бириистэри туттартаата. Хас биирдии кыттааччы туора турбакка көхтөөх кыттыыны ылла, оттон бырайыак кыттыылаахтара эҕэрдэ кэнсиэр көрдөрдүлэр, эбээннии ыллаатылар, һээдьэлээтилэр. Күрэхтэһии сүрүн уратытынан ыстаада киһитэ барыта көхтөөх кыттыыны ылбытын бэлиэтиибит. Чуум үлэһиттэрэ тэҥҥэ уучаҕы мииннилэр, маамыкка күрэхтэстилэр.
Төрүт үгэстэри тарҕатыы, сайыннарыы, эти-сиини чэбдигирдии — бырайыак сүрүн сыала. Онон маннык күрэхтэр ыытыллаллара суолталаах уонна тоҕоостоох. Ыстаада олоҕор кыра оҕотуттан кырдьаҕаһыгар тиийэ бу үгэскэ иитиллэ сылдьалларын көрөр хайҕабыллаах.
Күрэхтэһии түгэннэрин видео-матырыйаалга сиһилии көрүҥ:
keskil14.ru