Быйыл Н.И. Прокопьев аатынан Хатыы орто оскуолатыгар саҥа үѳрэх дьылын долгуйа күүппүт 7 оҕо саҥалыы ѳрѳмүѳннээх, сырдык, ыраас оскуола боруогун аан бастаан атыллаатылар.
Маҥнайгы чуораан чугдаар тыаһыгар иитээччилэрин, тѳрѳппүттэрин алгыһын ыланнар, үѳрэх-билии кыһатын киэҥ эйгэтигэр эрэллээхтик үктэннилэр.
Оҕолорбут үѳрэхтэригэр кѳмѳлѳѳх буоллун диэн Саха сирин Ил Дархана Айсен Сергеевич Николаевтан күннүк бэлэх туттулар. Күннүк ааптардарыттан биирдэстэрэ Хатыы оскуолатын выпускницата, ѳр сылларга алын кылаас учууталынан үлэлээбит Мария Борисовна Ядрихинская буоларыттан биһиги киэн туттабыт.
Сардаана Тихонова, 1 үѳрэнээччитэ: «Мин бу күннүгү бэлэх быһыытынан тутаммын олус үѳрдүм, инникитин үѳрэхпэр кыһаллыам, үчүгэй сыаналары ылыам диэн эрэннэрэбин».
Дьулус Ксенофонтов, 1 кылаас үөрэнээччитэ: «Сахалыы күннүк ыламмын наһаа үѳрдүм. Оскуолаҕа киирэммин элбэх саҥаны билиэм дии саныыбын».
Хатыы орто оскуолатын медиакиинэ.