Алтынньы ый 11 күнүгэр, 5 №-дээх оскуолаҕа маҥнайгы көмөнү оҥоруу күрэх региональнай сүүмэрдээһинэ ыытылынна. Бу бырайыак тэрийээччитинэн «Движение Первых» Арассыыйатааҕы оҕо уонна ыччат хамсааһына буолар. Ону таһынан, Дьокуускайдааҕы мед.колледж устудьуоннара тэҥҥэ үлэлэһэллэр.
Барыта өрөспүүбүлүкэбит 15 араас муннугуттан 30 хамаанда кэлэн бэйэтин көрдөрө сылдьар. Манна мустубут хамаандалар бары улуустааҕы күрэҕи ааһан, бастыҥнартан бастыҥнар кэлэн тураллар.
Күрэх уопсайа 5 хайысханан ыытыллар. Ол курдук, маҥнайгы көмөнү оҥорууга маастар-кылаастар, экскурсиялар, тематическай аһаҕас уруоктар, видео-куурустар уонна тургутук тестэр. Бүгүҥҥү региональнай сүүмэрдээһин кытааччылара 3 ыарахан хайысхаларынан күрэхтэһэллэр: бэйэни тугутан көрүү тестэрэ уонна икки түбэлтэҕэ маҥнайгы көмөнү оҥоруу.
Кыайбыт хамаанда сэтинньи ыйга Саранск куоракка ыытыллар бүтүн Арассыыйатааҕы күрэххэ Өрөспүүбүлүкэбит чиэһин көмүскүү барыаҕа.
Хас биирдии үөрэнээччи уонна оҕо ыксаллаах быһыыга-майгыга маҥнайгы көмөнү сатаан оҥорор буолуохтаах, тулалыыр дьоҥҥо үтүөнү аҕалыахтаах диэн санааттан тэриллибит бырайыак өссө да сайда, үүнэ-чэчирии турдун!
Сиһилии видео-матырыйаал: https://vk.com/video-199463452_456242199