Л.Н. Харитонов аатынан Маҕарас орто оскуолатыгар Кыайыы 80 сылын көрсө кылаастар икки ардыларыгар «Кыайыы салюта» диэн ааттаах бэстибээлбит биэс түһүмэҕинэн ыытыллар. Ол курдук хоһоон, ырыа, үҥкүү, тэттик киинэ устуу уонна көрдүүр (поисковай) үлэ түһүмэхтэрэ ыам ыйын 9 күнүгэр дылы буолуохтара.
Олунньу 15 күнүгэр «Кыайыы хоһооно» буойун суруйааччылар хоһоонноругар уус-уран ааҕыы күрэҕэ элбэх оҕону түмэ тутта.
Алын сүһүөххэ 1 миэстэни 2 кылаас үөрэнээччилэрэ буойун-бэйиэт Тимофей Сметанин хоһооннорунан кыайыылаах буоллулар. Онтон улахан бөлөххө Сергей Степанович Васильев-Бороҕоонускай «Улуу Ильмень» баллаадатын итэҕэтиилээхтик ааҕан 9 «а» кылаас уолаттара бастаатылар.
3 кылаас үөрэнээччитэ Сардана Павлова: «Ис сүрэхпиттэн бэлэмнэнэн, кыһаллан кытынным. Буойун суруйааччылар тустарынан элбэҕи биллибит, кылаас чааһа ыытыллыбыта», — диэн санаатын үллэстэр. Онтон 9 кылаас үөрэнээччитэ Ярик Петров: «Маннык тэрээһин эппиэтинэстээх. Кыайыыны уһансыбыт ытык дьоммутугар ытыктабыл, сүгүрүйүү бэлиэтэ буолар. Мин санаабар хас биирдии оҕо, ыччат эппиэтинэстээхтик сыһыаннаһан, Кыайыы 80 сылын тэрээһиннэригэр кыттыахтаах», — диэн этэр.
Оскуолабыт үөрэнээччитэ Ярик Петров эппитин курдук, бу маннык улахан тэрээһиннэр хас биирдии оскуолаҕа ыытыллыахтаахтар.
Айыллаана Афанасьева, «Одуну кыымнара» пресс-киин, Маҕарас орто оскуолата, Горнай.
keskil14.ru