Биһиги оскуолабытыгар алтынньы 10 күнүгэр үгэскэ кубулуйбут сатабыллаах салайааччы, убаастабыллаах учуутал, ытыктыыр дириэктэрбит Кирилл Иванович Платонов төрөөбүт күнүн көрсө араас тэрээһиннэр ыытылыннылар.
Кирилл Иванович 22 сыл Л.Н.Харитонов аатынан Маҕарас орто оскуолатыгар дириэктэринэн үлэлээбитэ. Кини — СР үөрэҕириитин туйгуна, РФ уопсай үөрэхтээһинин бочуоттаах үлэһитэ, 2015 сыллаахха «Россия 100 бастыҥ оскуолата» аатын ылан «Бастыҥ дириэктэр — 2015» аат, «Улуус сайдыытыгар кылаатын иһин» бэлиэ хаһаайыннара, «Улуус бастыҥ салайааччыта» анал аат кыайыылааҕа, «Барҕарыы» фонда стипендиата буолар.
Төһө да кылгас буоллар, олус чаҕылхай олоҕу олорбута, төрөөбүт нэһилиэгин, улууһун сайдыытыгар үгүс кылаатын киллэрбитэ. Нэһилиэкпит ыччаттара, оҕолоро үөрэхтээх, бастыҥ ыччат буолан тахсалларыгар сыратын, сатабылын, өйүн-санаатын бүүс-бүтүннүү уурбут, чахчы даҕаны бастыҥ салайааччы үрдүк аатын ылбыт киһибит буолар.
Бу күн Кирилл Иванович бииргэ төрөөбүт балта, педагогическай наука дуоктара, СР үөрэҕириитин туйгуна, М.К.Аммосов аатынан Хотугулуу-Илиҥҥи Федеральнай Университет профессора, Раиса Ивановна Платонова оҕолорго, оскуола кэлэктиибигэр баҕа санаатын, кэс тылын эттэ. Маны таһынан, үөрэппит оҕолоро, олохтоох дьаһалтаттан кэлэн үтүө тылларынан ахтан-санаан аастылар.
Дьоһун күҥҥэ оскуола оҕолоругар араас хабааннаах күрэхтэр ыытылыннылар. «Сахалыы сайаҕас тылынан сайа этэбин» 1-6 кылаас үөрэнээччилэригэр дьиэ-кэргэнинээн хоһоон ааҕыытын күрэҕин муҥутуур кыайыылаахтарынан буоллулар: 4 кылааска үөрэнэр Сандаара диэн кыыстарынаан Акулина Константиновна, Василий Семенович Максимовтар. Кинилэргэ Кирилл Иванович дьиэ-кэргэнин аатыттан эҕэрдэ сурук, бэлэх туттардылар. 2 миэстэҕэ тигистилэр: Амелия(1 кыл.), Вячеслав Петрович Максимовтар, Селена(1 кыл.), Марианна Васильевна Федотовтар, Виола(5 кыл.), Мария Александровна Мыреевтар, 3 миэстэни ыллылар: Матвей(5 кыл.), Диана Дмитриевна Дьячковскайдар, Эрхан(2 кыл.), Василий Петрович, Варвара Виссарионовна Кривошапкиннар.
“Оскуолам историята мин харахпынан” 7-11 кылаас уолаттарыгар ааҕыы күрэҕэ ыытылынна. Ол курдук, оскуола историятын эрэ буолбакка, үлэлээн ааспыт учууталлары, оскуола олоҕун, үлэтин кэпсээтилэр сырдаттылар. Ол түмүгүнэн, «Мин эбэм интернат иитээччитэ» диэн темаҕа кэпсээн 1 миэстэни 7 «а» кылаас үөрэнээччитэ Альгис Данилов ылла, 2 миэстэ — Эдик Ксенофонов (8 кыл.), 3 миэстэ — Тимур Андреев (11 кыл.) буоллулар.
Элбэх дьону түмэ туппут нэһилиэк тэрилтэлэрин икки ардыларыгар «Учуутал үрдүк аатыгар сүгүрүйэн» ток-күрэх ыытылынна. Манна барыта Одуну нэһилиэгин алта тэрилтэтэ кытынна. Олохтоохтор Кирилл Ивановиһы кытта алтыһан үлэлээбиттэрин туһунан сырдаттылар, ахтан-санаан аастылар. Горнай улууһун историятын, оскуолабыт үлэтин, айар үлэ түһүмэхтэргэ, араас ыйытыктарга эппиэттээтилэр, күрэхтэстилэр. Ол түмүгүнэн, муҥутуур кыайыылааҕынан «Тобул» диэн олохтоох администрация туруорбут хамаандата таҕыста. 2 миэстэни «Туллукчаана» оҕо сайдар киинэ, 3 миэстэни «Enjoy» кафе үлэһиттэрэ ыллылар.
Тэрээһиммитигэр кыттыбыт оҕолорго, төрөппүттэргэ, Кирилл Иванович дьиэ кэргэнигэр, «Одуну нэһилиэгэ» МТ дьаһалтатыгар (Текеянов В.М.), Одунутааҕы модельнай библиотека (Аянитова Г.А.), «Туллукчаана» оҕо сайдар киинигэр (Никаноров А.Д.), олохтоох сынньала4 киинигэр (Алексеева С.С.), олохтоох баһаарынай чааска (Максимов Н.С.), «Эрэл» ыччат түмсүүтүгэр (Брызгалов А.А.), «Enjoy» кафе үлэһиттэригэр (Колесова Л.Е.) махтанабыт. Маны таһынан, күүс-көмө буолбут Кирилл Иванович аймахтарыгар, 1981 сыллаахха оскуоланы бииргэ үөрэнэн бүтэрбит оҕолоро, бииргэ үөрэммит чугас доҕоругар В. Р. Кобяковка, бииргэ алтыһан үлэлээбит коллегаларыгар, үөрэппит оҕолоругар, 1992 сыллаахха оскуоланы бүтэрбит кылааһын оҕолоругар махталбытын тиэрдэбит!
Ытыктыыр учууталбыт Кирилл Иванович үүнэр көлүөнэ сайдарыгар, төрөөбүт-үөскээбит дойдутугар, дьонугар-сэргэтигэр үтүө өйдөбүлү хаалларбыт талааннаах энтузиаст-педагог, үөрэҕи-сырдыгы тэрийээччи, салайааччы быһыытынан мэлдьи ахтылла туруоҕа. Үйэлээҕи оҥорбут үтүө киһибит сырдык мөссүөнэ үйэлэри уҥуордаан угуйа турдун!
Лена Ноговицына, Л.Н.Харитонов аатынан Маҕарас орто оскуолатын 11 кылааһын үөрэнээччитэ