“Саха – от үлэтигэр сир үрдүгэр бастыҥ буолуо” диэн санаанан салайтаран, кэлэр кэнчээри ыччаттарбыт өбүгэлэрбит үтүө үгэстэрин утумнаан, саханы саха дэтиэхтэрэ диэн туран, Горнай улууһун Одуну нэһилиэгин “Дьоллоох” кэрэ сиригэр-уотугар от ыйын 17 күнүгэр үтүө үгэскэ кубулуйбут Өрөспүүбүлүкэтээҕи агрооскуолалар икки ардыларыгар “Күүлэй 2022” күрэх үрдүк таһымҥа ыытылынна.
Ол курдук, П.Н уонна Н.Е Самсоновтар аат. Хатас орто оскуолатын, Мэҥэ Хаҥалас улууһун А. Чугунов аат. Мэлдьэхси орто оскуолатын, П.И. Кочнев аат. Тулагы орто оскуолатын, Горнай улууһуттан В.Д. Лонгинов аат. Атамай орто оскуолатын, Кэптин орто оскуолатын, Л.Н. Харитонов аат. Маҕарас орто оскуолатын бастыҥ үөрэнээччилэрэ кэлэн күөн көрүстүлэр. Бу күрэхпитигэр бочуоттанар ыалдьыттарбыт өрөспүүбүлүкэ үс төгүллээх Дуолан охсооччута М.М. Андреева, өрөспүүбүлүкэҕэ декаданан оттооһуҥҥа 3 төгүллээх чемпион Н.Н. Баишев анаан-минээн оҕолорго кэс тылларын, баҕа санааларын эттилэр.
Анаабыт курдук олус үчүгэй күн туран биэрдэ. Оҕолор от охсууга эрэ буолбакка сынньалаҥ кэмигэр көрдөөх эстафетаҕа кыттан сүүрдүлэр-көттүлэр, маны таһынан хамаанданан чэй өрүүтүгэр күрэх буолла. Бу күрэххэ кыайыылааҕынан таҕыстылар Л.Н. Харитонов аат. Маҕарас орто оскуолатын хамаандата.
Күн устата кыргыттар олорон, сынньанан хаалбакка илиинэн 25*25 сири оҕустулар. Ол түмүгэр кыайыылаах үрдүк аатын Хатас орто оскуолатын үөрэнээччитэ Алина Бурцева ылары ситистэ уонна электросамокат хаһаайкатынан буолла. 2 миэстэни Тулагы орто оскуолатын үөрэнээччитэ Каролина Махарова, 3 миэстэни Кэптин орто оскуолатын үөрэнээччитэ Виолетта Алексеева ылла. Уолаттарга мотокосанан 35*50 сири 1 ч. 48 мүн. охсон, Л.Н. Харитонов аат. Маҕарас орто оскуолатын үөрэнээччитэ Василий Иванов кыайыылаах үрдүк аатын ылла уонна скоростной велосипед хаһаайынынан буолла, 2-с миэстэни ылары ситистэ Кэптин орто оскуолатын үөрэнээччитэ Семен Кузьмин (2ч. 30 мүн. 39 сөк), Атамай орто оскуолатын үөрэнээччитэ Афанасий Яковлев кыл мүччү 1 сөк. хаалан 3-с миэстэҕэ таҕыста. Уолаттарга 35*35 сири илиинэн от охсууга Мэлдьэхси орто оскуолатын XI кылааһын үөрэнээччитэ Ярослав Алексеев муҥутуур кыайыылааҕынан уонна мотоцикл хаһаайынынан буолла. Кини көрдөрүүтэ 1 ч. 34 м. буолбут буоллаҕына 2 мүнүүтэнэн хаалан, Маҕарас орто оскуолатын үөрэнээччитэ Алдан Наумов 2-с миэстэҕэ таҕыста. 3-с миэстэни ылары ситистэ Кэптин орто оскуолатын үөрэнээччитэ Арылхан Сидоров. От охсуутун күрэҕэр кыттыбыт оҕолорго спонсордар ааттарыттан сыаналаах бириистэр, анал ааттар туттарылыннылар.
Махтал тылларын аныыбыт өрөспүүбүлүкэтээҕи “Күүлэй – 2022” күрэҕи ыытарбытыгар күүс-көмө буолбут спонсордарбытыгар СӨ агрооскуолаларын союһугар, “Горнай улууһа” МО дьаһалтатыгар, С.Н. Донской аатынан ИРОиПК, улуустааҕы үөрэх салалтатыгар, улуустааҕы тыа хаһаайыстыбатын салалтатыгар, “Одуну нэһилиэгэ” МТ дьаһалтатыгар, ООО ИСК “Союз” тэрилтэтигэр, “Якутский скот” тэрилтэҕэ, ИП “И.Е. Ксенофонтов”, Л.Н. Харитонов аат. Маҕарас орто оскуолатыгар, В.Д. Лонгинов аат. Атамай орто оскуолатыгар, Софр.П. Данилов аат. Дьиикимдэ орто оскуолатыгар, Кэптин орто оскуолатыгар, “Туллукчаана” оҕо сайдар киинигэр.
Агро оскуола – бу сайдыы суола
Агрооскуола – улэнэн дьоллонуу
Агрооскуола – тыа сирин инники кэскилэ
Агрооскуола – мин тапталлаах оскуолам!
Лена Ноговицына,
XI кылаас, Маҕарас орто оскуолата.
Горнай.