Экологическай контейнер
Биһиги оскуолабытыгар “Экологическай контейнер” диэн акцияны оҥордубут. Бу контейнерга туттуллубут батарыайкалары уонна пластик хаппахтары хомуйабыт. Ханнык баҕарар үөрэнээччи уонна учуутал маннык бэлиэлээх батарыайкалары туттарыахтарын сөп: ААА, АА, С, D уонна ыраас пластик хаппах 2 эбэтэр 02 бэлиэлээх буолуохтаах.
Биһиги контейнербыт оскуолаҕа турар. Ол туоллаҕына, хомуллубут батарыайкалары уонна хаппахтары анал пууннарга туттарыахпыт. Итинник гынан биһиги оҕолору кыра саастарыттан туттуллубут малы туһунан хомуйарга уонна айылҕаны харыстыырга үөрэтэбит. Контейнеры оҥорорго матырыйаалын оскуола биэрбитэ. Химия учуутала Л.А. Аммосова уонна X кылаас үөрэнээччитэ Алик Трофимов фанераттан лобзигынан быһан оҥорбуттара. Кырааскалааһыҥҥа VI-с кылаас үөрэнээччилэрэ Даша Калитина , Амалия Трофимова уонна Венера Гаврильева үлэлэстилэр.
Маннык бэлэм экологическай контейнеры атыылаһар буоллахха, сыаната 7 тыһыынча солкуобайга тэҥнэһэр, онон бэйэ көмөлөөн оҥоруута ордук диэн сыаналыыбыт. Атын оскуолалары эмиэ маннык контейнердары оҥороргутугар ыҥырабыт.
Даша Аммосова, VII кылаас.
Кыһыҥҥы клубника
Былырыын алтынньы ыйга М.Е.Васильева аатынан 2-с Малдьаҕар орто оскуолатыгар тэпилииссэҕэ клубника үүннэрбиттэрэ. Маастар Людмила Абрамова этэринэн, San Andreas диэн суортаах клубника биир сезоҥҥа 3-4-тэ үүнүөн сөп. Былырыын оскуола дириэктэрэ Григорий Сысоев клубника олордуутун өйөөн, саҥа саҕалааһын ситиһиилээх буолла.
Балаҕан ыйыгар Новосибирскай куораттан клубника сиэмэтин аҕалбыттара. Саха сиригэр үксүгэр “Альбион” диэн суортаах клубниканы үүннэрэллэр, ол эрээри San Andreas да сорт бэйэтин үчүгэйдик көрдөрөн эрэр диэн оскуола маастардара бэлиэтииллэр. Биһиги агро хайысхалаах оскуола буоларбытынан, оҕолор кыһыҥҥы тэпилииссэҕэ тахсан үлэлиибит. Клубника Саха сирин тымныы кыһыныгар хайдах үүнэрин, төһө битэмииннээҕин, төһө дохуоттааҕын научнай чинчийии оҥорон үөрэтэр санаалаахпыт.
Дархан Тихонов, VI кылаас.
Биисинэскэ үөрэнэбит
Хаҥалас улууһун Улахан Аан нэһилиэгин агро хайысхалаах оскуолата кроликтары иитэр. Ааспыт сыл муус устар ыйыгар оскуола үлэһиттэрэ олохтоох ферматтан 5 тыһы уонна 2 атыыр хоруолугу атыыласпыттара. Күһүнүгэр төрүөх эбиллэн, оскуола үөрэнээччилэрэ номнуо 70 хоруолугу көрөр-истэр буолбуттара. Мантан аҥаарын кэриэтэ оҕолор бэйэлэрэ атыыласпыттар, хаалбыттарын аһатан-сиэтэн, уотан баран, эккэ ыыттылар. Олохтоох нэһилиэнньэҕэ киилэтин 450 солкуобайга атыылаатылар.
Саргы Степанова , VII кылаас.