Любамира Васильева Хатыы орто оскуолатын 11 кылааһын туйгун үөрэнээччитэ. Кини быйылгы Саха сирин Ил Дархан Харыйатыгар кыттыыны ылар чиэскэ тиксибитэ олус үөрүүлээх. Любамира кыра эрдэҕиттэн оскуола биир сүрүн актыбыыс оҕото. Оскуола аатын араас күрэхтэргэ, олимпиадаларга, научнай-практическай конференцияларга, спорт да өттүнэн күрэхтэргэ ситиһиилээхтик кыттан оскуолатын чиэһин көмүскүү, ааттата сылдьар.
Любамира көрсүө-сэмэй майгылаах, табаарыстарыгар, учууталларга эйэҕэс сыһыаннаах буолан, бэйэтин тула дьону мунньар. Оскуола президенынан талыллан, оҕолору түмэн, араас хайысхалаах күрэхтэргэ ситиһиилээхтик кытталлар. Ону таһынан, Ньурба улууһун Аҕа баһылыгын Алексей Михайлович Иннокентьев граныгар бырайыак көмүскээн, олоххо киллэрэн үлэлэтэн эрэллэр.
Элбэх оҕолоох ыалга улааппыт буолан, Любамира эппиэтинэстээх, ылсыбытын тиһэҕэр тиэрдэр, туохтан да толлон турбат, сатаабата диэн суох. Иистэнньэҥ бэрдэ, баайар, оҕуруонан тиһэр, сиэлинэн дьэрэкээн оҥоһуктары оҥорон араас быыстапкаларга кыттар.
Кыра эрдэҕиттэн хорсун, туохтан да толлон турбат, сытыы, булугас өйдөөх. Спордунан дьарыктанар, физкультура араас таһымнаах курэхтэригэр, олимпиадаларыгар кыттан оскуола чиэһин үрдүктүк көмүскүүр. Ол да иһин буолуо, кини бэйэтин баҕата юрист буолан, дьону көмүскүүр, харыстыыр сыаллаах, соруктаах.
«Любамирабыт туруоруммут сыалын толорон, оскуолатын бүтэрэн, талбыт үөрэҕэр киириэ диэн эрэнэбит», — диэн этэллэр доҕотторо, учууталлара, чугас дьоно.
keskil14.ru