Биһиги атырдьах ыйын 1-18 күннэригэр «Лингва» лааҕырга бырааппын Владигы кытта сырыттыбыт. Бу лааҕырга английскай тылы үөрэттибит. Араас сорудахтары, кроссвордары оҥорбуппут. Мин бу лааҕырга үһүс сылын сылдьабын.
Лааҕырга сылдьан элбэҕи билэбин дии саныыбын. Бэһис-алтыс кылааска английскай тыл олимпиадатыгар улууска 4 миэстэ буолбутум, онтон сэттис кылааска үөрэнэ сылдьан, английскай тыл олимпиадатыгар 5-с миэстэ буолбутум.
Лааҕыр кэмигэр Александр Самсонов-Айыы Уола музейыгар бара сылдьыбыппыт. Онно мин кини гитаратын, таҥастарын, массыынатын көрбүтүм, хаартыскаҕа түспүтүм.
Музей дьиэҕэ ийэтэ Марфа Иннокентьевна баар этэ, кини биһигини көрсүбүтэ, Айыы Уолун туһунан кэпсээбитэ.
Лааҕырга күҥҥэ иккитэ аһаталлара, олус минньигэс этэ. Оҕолору кытта араас интэриэһинэй оонньууларга кыттыбыппыт. Быраатым миигин кытта биир паартаҕа олорон үөрэммититтэн наһаа үөрдэ. Владик үһүс кылааһы бүтэрдэ. Кини лааҕырга бастакытын сырытта. Олус сөбүлээтэ.
Лааҕыр кэмигэр оскуолабыт таһынааҕы оҕуруокка үлэлээбиппит. Сыыс ыраастыыр, уу кутар, сибэккилэри көрөр-истэр этибит.
Мин бу сайын икки лааҕырга сырыттым: английскай тыл уонна физика, математика лааҕырыгар. Лааҕырга үлэлээбит учууталларбытыгар уонна асчыттарга, үлэһиттэргэ махтанабыт.
Стас ГРОМОВ,
Хаҥалас улууһун М.Е. Васильева аатынан
2-с Малдьаҕар орто оскуолатын 7-с кылааһын үөрэнээччитэ.