Дойдубут кэрэ көстүүтүн кытта алтыһан, самаан сайыммытын атаара, тапталлаах өрүспүт кытылыгар учууталларбыт тэрээһини бэрт сэргэхтик тэрийдилэр. Барыта холбоон 4 күрэх буолла. Күрэхтэрбит барыта сиэргэ-туомҥа, төрөөбүт дойдуну таптыырга, харыстыырга, айылҕаҕа ытыктабыллаахтык сыһыаннаһарга ситимнээх. Өбүгэлэрбит үгэстэрин тутуһан, улаханнык айдаарбакка, бөҕү-саҕы ыспакка сырыттыбыт.
Бастаан тиийээт алгыстаммыппыт. Аһатан-сиэтэн, бүөбэйдээн олорор айылҕабытыгар, өрүспүтүгэр махтал тылбытын эппиппит, алаадьынан күндүлээбиппит. Онтон хамаанданан бэйэни билиһиннэрии көрдөрбүппүт. Сорох оҕолор ыллаабыттара, сорохтор үҥкүүлээбиттэрэ, сорохтор тэттик сценка көрдөрбүттэрэ. Ол кэнниттэн хайысхаларынан арахсан сорудахтары толорбуппут. Бастакы хайысха – айылҕаны ыраастааһын. Ким элбэх бөҕү хомуйбут хамаандатыгар очукуо эбэр. Манна кэмпиэт, сакалаат суутун эрэ буолбакка, тостубут талахтары, мастары эмиэ хомуйабыт. Иккис хайысха – балыктааһын. Сүнньүнэн улахан кылаас уолаттара учуутал арыаллаах өрүскэ киирэн балыктаабыттара. Хаппыт балыктарынан миин буһарыы эмиэ туспа хайысха буолар. Онно ханнык хамаанда миинин минньигэстик буһарбытынан сыаналыыллар. Уонна бүтэһик хайысха – станциянан оонньуу. Манна өйбүтүн тургутар, ону таһынан эт-хаан өттүнэн эрчийэр оонньуулар бааллар.
Халлаан туруга күннээх эрээри тыаллаах буолан сөрүүн этэ. Сып-сылаас мииммитин иһэн тэрээһиммит өссө табыллыбыта. Мииммитин кытта дьиэбититтэн аҕалбыт аспытын тото-хана аһаабыппыт. Ол кэнниттэн убаастабыллаах дьүүллүүр сүбэбит түмүк таһааран, наҕараадалааһын буолбута. Хамаандалар бары уопсай түмүктэн астынан, бирииспитин ылан үөрүүбүт өссө үрдээбитэ. Айылҕа саамай киэркэйэн турар кэмигэр, көмүс күһүҥҥэ өйдөбүнньүк хаартыскаҕа түспүппүт. Онтон бары хомунан дэриэбинэ диэки хаампыппыт. Сатыы хаамар диэн эмиэ олус үчүгэй. Бары иллээхтик-эйэлээхтик, сайыҥҥы солуммутун кэпсэтэ-ипсэтэ хаамартан ордук туох кэлиэй…
Маннык тэрээһин сылын ахсын буолара хайҕабыллаах быһыы. Айылҕа оҕолоро буоларбытын умуннарбат сыалтан маннык тэрээһини оҥорор учууталларбытыгар махтанабыт. Биһиги олус сэргэхсийэн, билбэппитин билэн, үөрэн-көтөн, «дьоллоох оҕо сааспыт кэрэ түгэнэ» диэн өйбүтүгэр, сүрэхпитигэр хатанан хааллар ураты тэрээһин.
Амматааҕы лиссиэй 10б кылаас үөрэнээччилэрэ:
Федорова Арина, Яковлева Лилиана, Софронеев Ринат, Чаприна Айна
keskil14.ru