«Үлэни өрө тутан» диэн ааттаах улуус бочуоттаах олохтооҕо, тыыл уонна үлэ бэтэрээнэ Петр Гаврильевич Колотинскай төрөөбүтэ 95 сылынан хоһооннорун уонна айымньыларын ырытыы улуустааҕы күрэҕин олохтоох библиотека, Федорова Акулина Атосьевна уонна оҕолоро, сиэннэрэ тэрийэн ыыттылар. Чычымахтан 5 кыттааччы зуум нөҥүө киирэн үлэлэрин билиһиннэрдилэр. Харбалаах үөрэнээччилэрэ дьүүллүүр сүбэ иннигэр кэпсээтилэр. Тэрээһини Акулина Атосьевна киирии тылынан саҕалаата. Бырааттыы Мординовтар түмэллэрин сэбиэдиссэйэ Сардана Александровна Васильева П.Г. Колотинскай олоҕун, үлэтин туһунан билиһиннэрдэ.
Дьүүллүүр сүбэҕэ П.Г. Колотинскай кыргыттара: РСФСР үөрэҕириитин туйгуна Августина Петровна Кулачикова, СӨ үөрэҕириитин туйгуна Татьяна Петровна Мессеева, үлэ бэтэрээнэ, бастыҥ общественник Светлана Петровна Винокурова, түмэл сэбиэдиссэйэ С.А. Васильева, учуутал В.С. Кривошапкина үлэлээтилэр.
Оҕолор сүрдээҕин ааҕан, чинчийэн дакылаат суруйбуттарын дьүүллүүр сүбэ бэлиэтээтэ.
Түмүккэ маҥнайгы миэстэни Бястинов Айсен, 8 кыл. ХОК; Спиридонов Миша 8 кыл. ХОК; 2 миэстэни Иванов Сайаан, 8 кыл. ХОК; Чычымахтан Канаева Лиза,8 кылаас; үһүс миэстэни Копылов Мичил уонна Попов Чаҕыл ылан, туһааннааҕынан 5, 3, 1 тыһыынча харчынан бириэмийэ туттулар. Атын кыттыбыт үөрэнээччилэр «Биһирэбили» кытта харчынан бэлиэтэннилэр. Маны барытын Петр Гаврильевич оҕолоро, сиэннэрэ үбүлээтилэр.
Колотинскайдар дьиэ кэргэн аҕаларын сырдык аатын үйэтитэр араас тэрээһиннэри ыыталлара үгэскэ кубулуйда. Бастаан 2018 сыллаахха «Уол оҕо барахсан!» күрэҕи Харбалаах оскуолатыгар тэрийбиттэрэ, онно кыайыылааҕынан Антон Мазенцев тахсан ботуччу сууманан наҕараадаламмыта. Онтон пандемия кэмигэр ситиһиилээх уол оҕоҕо үс сыл субуруччу стипендия туттарбыттара. Быйыл аҕаларын айар үлэтин ырытыыга НПК тэрийдилэр. Онон учууталлар ааттарыттан уол оҕону сайыннарыыга ситимин быспат өйөбүллэрин, араас хайысхалаах тэрээһиннэрин иһин барҕа махталбытын тиэрдэбит! Үлэҕитигэр, үөрэххэ ситиһиини, тус олоххо дьолу баҕарабыт!
Валентина Кривошапкина, Таатта улууһа, Харбалаах