Быйыл 30-с сылын ыытыллар өрөспүүбүлүкэтээҕи «Инникигэ Хардыы» научнай-практическай кэмпириэнсийэҕэ истиэндэбэй көмүскээһини ааһаммын иккис турга кыттыыны ыллым.
Мин чинчийэр үлэм тиэмэтэ «Влияние алфавит-пазла на когнитивное развитие детей дошкольного возраста» диэн. Оҕолору сайыннарар тиэмэ бүгүҥҥү олоххо наадалааҕын, суолталааҕын учуоттаан талбытым. Салайааччым Марфа Ивановна Аржакова. Бэйэм балтылаах буоламмын бу тиэмэҕэ чугаспын. Элбэх дьоҥҥо, экспердэргэ, учууталларга, оҕолорго кэпсээтим.
Бэйэм юнкор буолан тураммын дьону кытта алтыһар сатабылларбын, билиибин-көрүүбүн сайыннарбыт буоламмын кэпсиирбэр ыарырҕаппатым. Үөрэ-көтө чэпчэкитик кэпсээтим. Оҕолору кытта билистим, уопут иҥэринним. Экспердэр үлэбин интэриэһиргээн көрдүлэр-иһиттилэр, боппуруос уонна сыаналаах сүбэлэри биэрдилэр.
Өрөспүүбүлүкэтээҕи лиссиэй-интэринээккэ туттарсар визитканы илиибэр тутаммын долгуйдум. Иккис түһүмэххэ ааспыппыттан олус үөрдүм. «Үлэм мээнэҕэ хаалбата» диэн киэн тутуннум.
Научнай үлэм салайааччытыгар М.И. Аржаковаҕа уонна «Тумус кыһа» медиа-киин салайааччытыгар С.Г. Марковаҕа олус махтанабын. Кинилэр билиигэ, сайдыыга сирдээн, аттыбар баар буолан, доҕор кэриэтэ өйөөн үчүгэйдик баран иһэбин.
Барыгытыгар ситиһиилэри баҕарабын. Туохтан да толлуман, инникигит диэки хардылаан иһин. Барыта табыллыа!
София ГОГОЛЕВА, IX кылаас, «Тумус кыһа» медиа—киин,
С.К. Макаров аатынан Чурапчы гимназията