Ыччакка үлэ сатабылларын иҥэрии, орто анал идэҕэ уһуйуу билиҥҥи кэм тирээн турар ирдэбилэ буолар. Үлэлии үөрэммит оҕо олоххо чиҥник үктэнэр.
Н.Е.Мординов-Амма Аччыгыйа аатынан Харбалаахтааҕы үөрэхтээһин холбоһугар ити хайысхаҕа үөрэх уонна наука министиэристибэтин быһа өйөбүлүнэн саҥардыныыга былааннаах үлэ күөстүү оргуйар.
«Литейнэй мастарыскыай» уонна «Тыа хаһаайыстыбатын үлэлэригэр туһаныллар көлөлөр» мастарыскыайдарын тэриллэрэ 95% бырыһыана кэлэн, турар дьиэтин-уотун бэлэмнии сылдьаллар, бүтэрэ чугаһаата. Алтынньы 18 күнүгэр үөрүүлээх аһыллыыта былааннанар.
Бу мастарыскыайдар тигинэччи үлэлээн, өрөспүүбүлүкэ араас улуустарыттан кэлбит ыччаттары үлэ үөрүйэхтэригэр уһуйарга төһүү күүс буолуохтара.
Валентина Кривошапкина, Таатта Харбалаах.