Соторутааҕыта Дьокууксай куоракка ыытыллыбыт үөрэх үлэһиттэрин тохсунньутааҕы сүбэ мунньахтарын чэрчитинэн, дириэктэр сүбэһиттэрэ түөрт күн «Кыһыҥҥы оскуолаҕа» үөрэммиттэрэ. «Саха өрөспүүбүлүкэтин бастыҥ сүбэһитэ» диэн бастакы өрөспүүбүлүкэтээҕи куонкурс финальнай түһүмэҕэ буолан ааспыта. Бу куонкуруска биһиги оскуолабыт сүбэһитэ, медиа кииммит салайааччыта Саргылана Прокопьевна Леонтьева финалист буолан, кыттыыны ылбыта уонна «Новые горизонты» номинацияны ылары ситиспитэ.
Бу биһиги Сарглына Прокопьевнабыт үлэтин түмүгүн ситиһиитэ буолар дии саныыбын. Дириэктэр сүбэһитэ диэн чэпчэки үлэ буолбатах. Оҕолору кытта наар биир кэм үлэлэһэр уонна кинилэр сайдалларын туһугар болҕомтотун уурар.
Мин Саргылана Прокопьевнаны кытта көрсөн кэпсэттим, интервью ыллым.
– Саргылана Прокопьевна, «Саха өрөспүүбүлүкэтин бастыҥ сүбэһитэ» бастакы өрөспүүбүлүкэтээҕи куонкуруска бастыҥнар кэккэлэригэр киирбиккинэн эҕэрдэлиибит! Куонкурус туһунан кылгастык билиһиннэр эрэ.
– Үтүө күнүнэн Лилия! Бу күрэх ааспыт сылга кулун тутар ыйтан саҕаламмыта. Үс түһүмэхтээх, сэттэ хайысхалаах. Ол курдук, бастакы түһүмэххэ үөрэнээччилэр кыттар кандидаты туруоран, Вк страницаларыгар кинини сырдатар пост таһаарыахтаах этилэр. Мин кыттыбыт хайысхам «Новые горизонты» диэн. Ол эбэтэр үлэлиир оскуолаҕар биир ханнык эрэ хайысханы сайыннаран, ситиһиилээхтик үлэлии сылдьар буолуохтааххын. Иккис түһүмэххэ кейсовай сорудахтары толорбуппут. Үһүс түһүмэх бу буолан ааста.
– Эн бу куонкуруска сүрүн туохха болҕомтоҕун уурдун, тугу сөбүлээн көрдүҥ?
– Саамай сөбүлээбитим диэн – күрэх кыттыылаахтарын, биир соруктаах үлэлии сылдьар оҕо саас сирдьиттэрэ түмсүүлээхпитин, бэйэ-бэйэбитин өйдөһөрбүтүн. Бииртэн биир туспа көрүүлээхтэр, ньымалаахтар, ураты суоллаахтар-иистээхтэр. Барыларын кытта билсэн, инникитин сибээспитин быспакка билсиэхпит, үлэбит уопутун атастаһыахпыт диэн араҕастыбыт.
Дьону кытта сатаан алтыһыы үлэ ситиһиитин саҕаланыыта дии саныыбын. Хас биирдии киһи миэхэ ааҕыллыбатах саҥа кинигэ курдук. Ол иһин саҥа билсиһиилэртэн олус үөрэбин.
– Дириэктэр сүбэһитэ диэн оскуолаҕа баар буолбута үһүс сылыгар барда. Аан бастаан барыта хайдах саҕаламмытай?
– Аһаҕастык этэххэ, наһаа улахан дуоһунаһы сүктэрдилэр диэн бастаан куттаммытым. «Дириэктэр сүбэһитэ» диэн дуоһунаспыт аата улахана да сүрдээх. Онтон дьэ үлэлээн, тугун-ханныгын билэн, суолбун-ииспин булуммутум. Биһиги үлэбит улахан эппиэтинэһи сүктэрэр, түргэн толкуйу, хамсаныыны, хамсатыыны эрэйэр.
– Дириэктэр сүбэһиттэрэ оҕолору кытта үлэлэһэҕит. Үлэлээбитин тухары саамай өйдөөн хаалбыт түгэнин ханныгый?
– Саамай өйдөөн хаалбыт түгэним диэн… арааһа, ааспыт үөрэх дьылын тиһэх чуораана. Бииртэн биир активист, чаҕылхай оҕолорум, медиа киин үлэтин саҕалыырбар көмөлөспүт, өйөөбүт үөрэнээччим Вика Борисова оскуоланы бүтэрэн баран эрэллэриттэн наһаа долгуйбутум. Бу тиһэх чуораан хайдах эрэ ураты истиҥник ааспыта. Тыл этэ туран уйадыйбыппын бэйэм да билбэккэ хаалбытым…
– Оҕо саас сирдьиттэрэ — Навигаторы детства миссиятын эн туохха көрөҕүнүй?
– Хас биирдии оҕо сайдарыгар сөптөөх эйгэни тэрийии бу биһиги сүбэһиттэр сүрүн миссиябыт диэн көрөбүн. Хаһан баҕарар көмө, өйөбүл буоларга бэлэммин.
– Саргылана Прокопьевна, эн бастакы идэҥ – медик. Балыыһаҕа үлэлии сылдьан оскуолаҕа хайдах кэлбиккин туһунан кэпсиэҥ дуо?
– Дьокуускайдааҕы медицинскэй колледжы 2009 сыллаахха бүтэрбитим. Бастакы нүөмэрдээх поликлиникаҕа 8 сыл идэбинэн олус үчүгэйдик үлэлээбитим.
Куоракка олорорум, үлэлиирим тухары түүлбэр наар үөрэммит оскуолам көрүдүөрүнэн хааман иһэрбин көрөрүм.
Онтон иккис оҕобун оҕолонон баран дойдубар көһөн кэлбитим. 2017 сыллаахха оскуолаҕа «инструктор по гигиеническому воспитанию» диэн дуоһунаска үлэлии киирбитим. 2021 сыллаахха уурайан баран, биир сыл идэбинэн Чурапчыга үлэлээбитим. Ол кэмҥэ Чурапчытааҕы институкка «организация работы с молодежью» диэн хайысхаҕа үөрэххэ киирбитим. Үлэлии сылдьан «дойдубар төннөр эбиппин» диэн быһаарыммытым. Ол туһунан оскуолам дириэктэриттэн Федор Игнатьевич Борисовтан «тиийдэхпинэ төттөрү үлэҕэ ылыаххыт дуо» диэн ыйыттым. Дириэктэрим үөрүүнү кытта сөбүлэспитэ, оскуолабытыгар «дириэктэр сүбэһитэ» диэн саҥа дуоһунас киирэн эрэр, эбии үөрэн уонна кэлэн үлэлээ диэн эппитэ. Хас да ый устата үөрэнэн, сүүмэрдээһини ааһан, 2022 сыл балаҕан ыйын 1 күнүттэн саҥа доһунаска үлэлээн саҕалаабытым.
Мин санаабар, миигин бу суолбунан дьылҕам уонна суолталаах дьон сирдээн аҕаллылар. Бу билиҥҥи үлэм бэйэбин ситэрэр, сайыннарар, кынаттыыр. Төрөппүттэрбэр, бииргэ үлэлиир коллегаларбар, доҕотторбор, үөрэнээччилэрбэр уонна биллэн туран, «Кэскиллэрбэр», эһиэхэ юнкордарбар улахан махталбын тиэрдэбин. Эһиги миэхэ итэҕэйэргит, эһиги көмөҕүт күүспэр күүс эбэр, үрдүккэ кынаттыыр.
– Саргылана Покопьевна, өссө биирдэ ис сүрэхпититтэн эҕэрдэлиибит! Үрдүк ситиһиилэри, таһаарыылаах үлэни баҕарабыт.
– Махтал, Лилия!
Кэпсэттэ Лилия МАРКОВА, VIII кылаас,
А.П. Илларионов аатынан Хайахсыт орто оскуолата, Чурапчы