2023 сыл — Үлэ сыла. Тыа ыала ынах, сылгы-сүөһү иитиитинэн дьарыктанан олоруохтааҕар, олох ирдэбилэ буолла. Ороһу нэһилиэгэр үс тэриллиилээх хаһаайыстыбаны эдэр дьон тутан-салайан олороллор. Эрик Владимирович Павлов оҕолорунаан, аймахтарынаан, Симон Егорович Быккасов, Айсен Игорьевич Тюляхов. Ороһулар эрэ буолбакка улуус тыатын хаһаайыстыбатын салайааччылара, үлэһиттэрэ кинилэр түбүктээх үлэлэрэ түмүктээх буоларыттан үөрэллэр уонна киэн тутталлар.
Улууска тэриллиилээх хаһаайыстыбалары, кэтэх ыаллар сүөһүлэрин ааҕан туран, Ороһу саамай элбэх сүөһүлээҕинэн биллэр. Ол курдук, ынах-сүөһү ахсаана — 537, ол иһигэр ыанар ынаҕа — 255, сылгы-сүөһү — 471, ол иһигэр биэтэ — 289. Сыллата үүтү туттарыы былаана туолан, аһары барар.
Ороһуга Үөһээ Бүлүү улууһун тыатын хаһаайыстыбатын начаалынньыга Сергей Иванович Иванов, бэтэринээринэй сулууспа начаалынньыга Владимир Владимирович Мачахтыров, ас-үөл кэмбинээтин дириэктэрэ Александр Васильевич Саввинов тыа хаһаайыстыбатынан дьарыгырар олохтоохтору кытта көрсүһэн бардылар. Мунньаҕы нэһилиэк баһылыга Анатолий Васильевич Антонов иилээн-саҕалаан ыытта.
Кэпсэтии сүрүнэ: Ороһуга баар үүтү тутар собуокка быйылгыттан ыла үүтү тутан, үрүҥ аһы астыырга, үүт аннын ылар дьоҥҥо босхо биэрэргэ, ынах-сылгы төбөтүн энчирэппэккэ тутан олорорго, кыах баарынан элбэтэри ситиһэргэ.
Ороһуга эдэр ветвраһы билиһиннэрдилэр. Киниэхэ, Анатолий Михайлович Ивановка, таһаарыылаах үлэни баҕардылар.
Олохтоохтор сакаастаабыт уотурбалара, мээкэлэммит отторо кэмигэр кэлэн иһэригэр туруорустулар.
Нина Михайлова, Ороһу.