Быйыл 2023 сылы Саха сирин Ил Дархана Үлэ сылынан биллэрбитэ. Мин саныахпар дьон бары үлэлээх буоллуннар, үлэлээн аһаан-сиэн, үчүгэйдик олордуннар уонна үлэни таптаан сыаналаатыннар диэн маннык биллэрбитэ буолуо. Тоҕо диэтэххэ, үлэтэ суох киһи дьоло суох. Киһи үлэлээбэт буоллаҕына, харчыта суох, аһа-таҥаһа, доҕотторо, дьиэтэ-уота, кэргэнэ-оҕото суох буолуо. Оччоҕо соҕотохсуйар, сордонор.
Оскуолабытыгар Үлэ сылыгар анаан «Үлэ киһини киэргэтэр» диэн эркин хаһыатын күрэхтэһиитэ буолла. Манна 5-11 кылаастар кытынныбыт. Биһиги нэһилиэкпититтэн төрүттээх үлэлээн орден ылбыт дьоннорбут туһунан хаһыаты оҥорбуппут. Ол курдук, 13 киһи «Үлэ Албан аата», 1 киһи «Бочуот Знага», 1 киһи «Үлэ Кыһыл Знамята», 1 киһи «Ленин» орденнаахтар эбит. Кинилэр бары наар үлэлээн-хамсаан ылбыт наҕараадалара буолар. Наһаа сылаалаах, түбүктээх үлэҕэ үлээн ааспыттар эбит. Биллэн турар, итинник наҕарааданы киһи аайы биэрбэттэр, бастыҥтан бастыҥҥа эрэ бэриллэр орденнар. Биһиги хос эбэлэрбит, эһэлэрбит тустарынан, кинилэр ситиһиилэрин туһунан элбэх саҥаны биллибит. Наар ынах ыан бастыҥ ыанньыксыт аатын ылан, Ленин орденынан наҕараадаламмыт Екатерина Ивановна Винокурова, бастыҥ торбос иитээччи Александра Даниловна Винокурова уонна «Үлэ Албан аата» орден толору кавалера Май Саввич Третьяков билигин бочуоттаах сынньалаҥҥа олороллор эбит. Оттон атыттар, хомойуох иһин, билигин биһиги кэккэбитигэр суохтар. Биһиги маннык үлэһит, бастыҥ дьоннордоохпутунан киэн тутуннубут, кинилэри холобур оҥостуохпут.
Бу куонкуруска бастакы миэстэни «Орденнаах биир дойдулаахтарбыт» диэн ааттаах 6-ыс кылаастар хаһыаттара ылла. Кинилэр хаһыаттара саамай баай ис хоһоонноох этэ.
Сааскылаана Бубякина, 5 кылаас,
Игнат Винокуров, 6 кылаас.
Орто Халыма, Өлөөкө-Күөл б.