Ийэм Капитолина Петровна, аҕам Гаврил Андреевич Селясиновтар оҕо эрдэхтэриттэн төрөппүттэрин иитиилэринэн үлэни өрө туппут дьон. Ол да курдук, ынах, сылгы сүөһүнү тутан, биһигини үрүҥ аһынан, этинэн аһатан улаатыннардылар.
Эдьиийдэрим, убайым улаатаннар, атын сиргэ олороллор, үлэлииллэр. Кыра убайым Сахамин 2022 с. оскуоланы бүтэрэн баран, билигин аармыйаҕа сулууспалыы сылдьар. Кини үксүн миигин дьиэ таһыгар, от үлэтигэр сыстаҕас буоларга үөрэппитэ. Билигин дьиэҕэ, төрөппүттэрбинээн мин эрэ баарбын, онон дьиэ ис-тас үлэтигэр үөрэҕим быыһыгар көмөлөһөбүн. Алта ыанар ынахтаахпыт, бу күннэргэ түөрдэ төрөөн турар. Ийэлээх, аҕабар түбүк бөҕө. Аҕам үлэтин күнүгэр Эбэттэн уу баһабын, кыбыыга от бэлэмнээн, хотон түннүгүнэн күкүргэ от симэбин. Атын да күҥҥэ син биир илиибин араарбакка үлэлиибин. Хата, быйыл дьиэбит таһыгар аты кытта убаһа кыстаан ноһуомнарын ыраастыыр аматыйда. Урут элбэх сылгы кыстыыр эрдэҕинэ, ноһуомнарын ыраастаан, тыраахтырга тиэйэн, ыраах бааһынаҕа илдьэн кутарбыт. Атын сылгыларбыт ыраах арыыга бааллар, аҕам «бураанынан» баран аһатан кэлэр.
Сайын от үлэтэ. Хата, ыанар ынах аайы отут биэстии тыһыынча биэрэннэр, оту урулуоннууру атыылаһан, оттуурбут чэпчээтэ. Тыраахтыры ыытар буолан, дьоммор көмөм улахан. Дьаархан, Уһун Күөл, Мэмиилэй, Ураанньык, Чээппэ алаастарга оттоон, кыстыыр оппутун
оттоон, дьылы этэҥҥэ түмүктүөхпүт диэн эрэллээхпит.
Тыа оҕото буоларым быһыытынан уонна төрөппүттэрим үлэнэн иитэллэринэн үлэттэн толлубаппын. «Үлэ киһини киһи гынар» диэн бэргэн этиини кытта сөбүлэһэбин.
Айыстаан Селясинов, 9 кылаас үөрэнээччитэ, Ороһу.