И.Н. Слепцов аатынан Кустурдааҕы агро оскуола сайыҥҥы үлэтин туһунан
Иннокентий Николаевич Слепцов аатынан Кустуурдааҕы агро оскуола оҕолор сайдалларыгар, үлэлииллэригэр, сайыҥҥы сынньалаҥ кэмигэр тустаах үлэни ыытта.
Биһиги оскуолабыт хаһаайыстыбалаах, сири кытта үлэҕэ чугас буоларын туһугар улууспут урукку баһылыга Гаврил Гаврильевич Горохов болҕомтотун ууран, оскуолабыт саҥа таһымҥа тахсарыгар, кыаҕын ыларыгар улаханнык өйөөбүтэ, көмөлөспүтэ. Агро хайысхалаах үлэ улуус салалтатын өттүттэн өйөбүллээх эрэ буоллаҕына, үлэни кыайа тутар.
Оскуолабыт дириэктэрэ Матрена Алексеевна Горохова оҕолорбут сайыҥҥы кэмҥэ үлэлиир, сынньанар сирдэрин-уоттарын булан,өссө саас үлэһиттэрин аттаран туруоран, оскуолабыт иһинэн олус үчүгэй база оҥоһулунна, дьиэ-уот тутулунна. Бу базабыт кылгас кэм иһигэр учууталларбыт, тех. үлэһиттэрбит уонна бэдэрээччит Д.П. Горохов көмөтүнэн олоххо киирдэ.
Оҕолорбут «Сайдыы» волонтерскай этэрээттэрэ сөргүтүллэн, сайын устата бу базаҕа үлэ күөстүү оргуйда. Дириэктэрбит М.А. Горохова тус бэйэтинэн, наставниктарынан В.И. Захарова, И.Е. Другин оҕолору илдьэ сылдьаннар, үлэҕэ үөрэттилэр, оттоотулар. Барыта тоҕус оҕо сырытта. Кинилэр элбэххэ үөрэнэн, окко буһан-хатан, үөрэ-көтө сырыттылар. Күрүө тутуутугар сигэни баайарга, от охсорго, харбыырга, эппэлээһиҥҥэ, бугуллаан кэбиһиигэ үөрэннилэр. Сылаас күннэргэ күөгүлээн балыктаатылар, үүнээйилэри үөрэттилэр, дойдубутугар үүнэр сир аһын тото-хана амсайдылар, хоту сир кылгас сайыныгар салгыҥҥа дуоһуйа оонньоотулар, доруобуйаларын бөҕөргөттүлэр. «Саха ынаҕа» тэрилтэни кытта сөбүлэҥ түһэрсэн, үлэ былаанын толордулар. Бу базабыт оҕону үлэҕэ уһуйууга, үөрэтиигэ инники да өттүгэр сүрүн тирэхпит буолуо диэн эрэнэбит.
Быйыл сайын таба ыстаадатыгар алта оҕо тахса сырытта. Дьоннорун кытта тэҥҥэ сылдьан, ыстаада үлэтигэр көмөлөһөн баран, күһүн үөрэх дылын саҕаланыыта атырдьах ыйын 25 күнүгэр Кустуурга бөртөлүөтүнэн кэлбиттэрэ. Бииргэ үөрэммит табаарыстарын, оскуолаларын ахтан, биир да күн хойутаабакка балаҕан ыйын 1 күнүгэр ыраах ыстаада сириттэн оскуолаларыгар кэлбиттэрэ.
Сайын оскуолабыт теплицатыгар оҕуруот аһын үүннэрэн, нэһилиэкпит дьонун оҕуруот аһынан хааччыйдыбыт, атыылаатыбыт. Бу үлэни производственнай маастар В.Г. Стручкова иилээн-саҕалаан ыытта. Киниэхэ лааҕыр оҕолоро – орто сүһүөх уонна алын кылаас үөрэнээччилэрэ күүс-көмө буоллулар.
Агро хайысхалаах оскуолабыт оҕону үлэлииргэ үөрэтэр. Үлэһит оҕо өй-санаа, эт-хаан өттүнэн сайдар.
Валентина КОЛЕСОВА, агропроизводственнай үлэҕэ дириэктэри солбуйааччы,
И.Н. Слепцов аатынан Кустуур орто оскуолата, Эбээн Бытантай