Улууспут нэһилиэктэригэр, оскуолаларыгар Арассыыйа Үлэҕэ Дьоруойа, Үлэ Албан аат уордьан толору кавалера, «Удьуор» бааһынай хаһаайыстыба салайааччыта Михаил Николаевич Готовцев 80 сааһыгар аналлаах «Килбиэннээх үлэ эстафетата» уонна «Дьоруой аатынан киэн туттабыт» диэн патриотическай тэрээһиннэр салҕанан бараллар.
Кулун тутар 10 күнүгэр Үлэ Дьоруойа Михаил Николаевич Готовцев Аҕа дойду Улуу сэриитин кыттыылааҕа, Арассыыйа Дьоруойа Михаил Михайлович Стрекаловскай төрөөбүт дойдутугар Өнөр нэһилиэгэр ыалдьыттаата. Килбиэннээх үлэ эстафетата Өнөрдөөҕү култуура киинигэр кини олоҕун, үлэтин кэпсиир Тандатааҕы историко-архитектурнай түмэл, Танда орто оскуолатын уонна олохтоох бибилэтиэкэ туруорбут көһө сылдьар быыстапкаларын билиһиннэрииттэн саҕаланна.
Ол кэнниттэн Михаил Николаевич Готовцевы кытта көрсүһүү, кэпсэтии буолла. Манна туһаайан этээххэ, Михаил Николаевич Өнөр нэһилиэгэр бу аан бастакы сырыыта.
Онтон кулун тутар 11 күнүгэр биһиги Лөгөй нэһилиэгэр сырыттыбыт. Лөгөй лиссиэй-интэринээтигэр Үлэ Дьоруойун кытта көрсүһүү үөрүүлээхтик, умнуллубаттык буолан ааста. Михаил Николаевич оҕолорго бэйэтин олоҕун туһунан кэпсээтэ.
– Лөгөй сириттэн төрүттээх Үлэ Дьоруойа Настаа – Анастасия Семёновна Копырина миэхэ эдьиийим кэриэтэ киһи этэ. Настаа курдук сүөһү көрөн 60 сыл устата үлэлээн кэллим, – диэн эттэ М.Н. Готовцев.
Оҕолор элбэх ыйытыылары биэрдилэр. Ол кэнниттэн маастар-кылаастар, уроктар буоллулар. Оскуола үөрэнээччилэригэр оҕолор бэйэбит оонньуу ыыттыбыт.
Ити курдук айаммытын салҕанар. Түмүктүүр тэрээһиммит 1 Хоро нэһилиэгэр кулун тутар 24 күнүгэр буолуоҕа.
Снежанна ГОТОВЦЕВА, IX кылаас,
М.Н. Готовцев аатынан Танда орто оскуолата, Уус Алдан
Ааптар хаартыскалара