Үлэ Дьоруойа Михаил Готовцев: «Дойдугутугар үлэлээҥ!»

М.Н. Готовцев аатынан Танда орто оскуолатыгар оҕону төрөөбүт дойдутугар бэриниилээх гына уонна үлэнэн иитии араас ньымаларыгар Уус Алдан улууһун үөрэҕин управлениетыттан уонна улууспут бастыҥ көрдөрүүлээх учууталлара кыттыылаах методическай десант үлэлээтэ.

Бу тэрээһин чэрчитинэн, оскуолабыт IV, VII, Х кылааһын үөрэнээччилэригэр аһаҕас уруоктар, кылаас-чаастар ыытылыннылар. IX, XI кылаас үөрэнээччилэригэр психологическай тренинг уонна биир кэлим экзамеҥҥа, чуолаан нуучча тылын, математика биридимиэттэргэр туһалаах дьарыктар буоллулар. Маны таһынан учууталларга, төрөппүттэргэ маастар-кылаастар, оҕону иитиигэ сүбэ мунньах ыытылынна.

Бу тэрээһиҥҥэ Россия Үлэҕэ Дьоруойа М.Н. Готовцев кыттыыны ылла. Кини оҕолорго, методическай десант кыттыылаахтарыгар бэйэтин олоҕуттан, хайдах Үлэ Дьоруойа буолбутун туһунан кэпсээтэ. Кини оҕолорго:

«Үөрэнэн, специалист буолан кэлэн, дойдугутугар үлэлээҥ, дойдугутун сайыннарыҥ», – диэн алгыс тылын эттэ.

Россия үрдүнэн 2024 – Дьиэ кэргэн сыла. Онно анаан оскуолабыт үөрэнээччилэрин, төрүппүттэрин дьиэ кэргэттэрэ оҥорон таһаарбыт сиэдэрэй оҥоһуктарынан турбут быыстапка дьон болҕомтотун тарта.

Биһиги тэрээһин кыттыылахтарын көрсөн кэпсэттибит.
– Үтүө күнүнэн! Бэйэҕит тускутунан билиһиннэриэххит дуо?
– Людмила Романовна диэммин, Тааттаттан кэлэ сылдьабын. Оҕом Эльмира Сивцева Танда орто оскуолатын VIII кылааһын үөрэнээччитэ.
– Оҕону иитиигэ сүрүн оруолу туохха уураҕытый?

Оҕо үөрэҕин таһынан дьарыктаах буолуохтаах. Ол сыалтан оҕобут VI кылааска Максим Николаевич Аммосовка волейболунан дьарыктана кэлбитэ. Бу оскуолаҕа үөрэнэрин, дьарыгын сөбүлээн сылдьар.

– Дьиэ кэргэҥҥитигэр туох үгэстээххитий?
– Бары сир астыырбытын сөбүлүүбүт уонна бырааһынньыктары тэҥҥэ ыла сатыыбыт.

Маастар-кылаастарга, уруоктарга сылдьыбыт оҕолор санааларын эмиэ ыйыталастыбыт.
Яков Охлопков В.Д. Лонгинов аатынан Бээрийэ орто оскуолатын IX кылааһын үөрэнээччитэ.
– Эн санааҕар, консультациялар хайдах аастыларый?
– Мин санаабар, бу консультация үчүгэй баҕайытык ааста. Элбэх билиини ыллым. Салҕыы инник элбэх консультациялар буолуохтара диэн эрэнэбин.

***

Эльза Прибылых И.С. Колодезников аатынан Тиит Арыы сүрүн оскуолатын IX кылааһын үөрэнээччитэ. Кини ,у тэрээһинтэн элбэҕи эбиммит. Биллэн туран, быйыл ОГЭ туттарар эппиэтинэһигэр сылдьар буолан, консультациялары сөбүлээбит. Инникитин туһалыа диэн эрэнэр.

Дойдуга бэриниилээх уонна оҕону үлэнэн иитии тиэмэтигэр маастар-кылаас ыыппыт И.И. Черкашина: «Ульяновскайга буолбут «ЧЕРУК» учууталлар хамаандаларын чемпионатыгар маастар-кылаас ыыппыппыт. Манна ыыппыт маастар-кылааспытыгар патриотизм өйдөбүлүн предмети кытта алтыһыннары тутан, ол хайысхатынан көрөн кэпсээтибит. Оскуолабытыгар Суоттуттан 4 оҕо кэлэн үөрэнэ сылдьар. Ол аата Танда оскуолата үчүгэй оскуола диэн этэбит. Оҕолорго үөрэхтэригэр ситиһиилэри уонна салгыы сайда, чэчирии туралларыгар баҕарабыт».

Биһиги санаабытыгар, үөрэнээччилэргэ, учууталларга, төрөппүттэргэ олус интэриэһинэй туһалаах тэрээһин үрдүк таһымҥа ыытылынна. Инникитин маннык хабааннаах тэрээһиннэр ыытылла туралларын баҕарабыт.

Снежанна ГОТОВЦЕВА, Айыллаана ГОТОВЦЕВА, VIII кылаас,

Туйаара МАМОНТОВА, IX кылаас, Валерия ГОТОВЦЕВА, X кылаас,

“Байаҕантай кэскиллэрэ” юнкордара,

М.Н. Готовцев аатынан Танда орто оскуолата, Уус Алдан