Гражданскай сэрии дьоруойа Кеша Алексеев аатын сүгэр Хаптаҕай орто оскуолатын «Кустук» студия корреспонденнара кыһыҥҥы тымныыларга дьиэбитин-уоппутун сылааһынан хааччыйар тэрилтэ начальнигын Андрей Кириллович Самсоновы кытта көрсөн кэпсэттибит https://vk.com/wall-199463452_25879
– Андрей Кириллович, бастатан туран, кыстыкка киирбиппитинэн! Эһиги хас эбийиэги сылааһынан хааччыйан олороҕутуй?
– Биһиги администрация котельнайыгар киирэн турабыт. Бу котельнай администрация дьиэтин уонна балыыһаны сылааһынан хааччыйар. Онтон “Квартальнай” котельнайга тоҕус эбийиэк холбонон турар.
– Хас үлэһиттээххитий?
– 12 үлэһиттээхпит: 8 оператор уонна 3 слесарь. Сменаҕа биирдии буолан тураллар. Администрация котельнайыгар 4, “Квартальнайга” эмиэ 4 оператор үлэлиир.
– Андрей Кириллович, котельнайдар урут чоҕунан оттуллар эбит буоллахтарына, билигин бары газка көһөн тураллар.
– 2006 сыллаахха бастаан “Квартальнай” котельнай газка холбоммута. Онтон 2008 сыллаахха – администрация котельнайа. Уруккуну кытта тэҥнээтэххэ, үлэбит быдан чэпчээтэ, сылааһа, ырааһа. Ол эрээри эппиэтинэс кыччаабат. Котельнайдар аайы температурнай график диэн баар. Таһырдьа хас кыраадыс буолбутун көрөн, онно сөп түбэһиннэрэн оһохторбутун салайан, туруоран биэрэбит.
– Оператор үлэтэ ханнык хаачыстыбаны ирдиирий?
– Бастатан туран, эппиэтинэс. Үлэлэригэр хойутаабакка чопчу кэлиэхтээхтэр. Сибээскэ наар баар буолуохтаахтар.
***
Биһиги салгыы Андрей Кириллович Самсоновы кытта “Квартальнай” котельнайга тиийэн кэпсэттибит. Кэпсэтиибит саҕаланыытыгар эппитин курдук, бу улахан колтельнай 9 эбийиэги сылытар: ветеранария дьиэтин, икки уопсай, 14, 4 квартиралаах дьиэлэри, оскуоланы уонна оскуола мастарыскыайын, ону тэҥэ санаторий дьиэтин, оҕо саадын.
Түгэнинэн туһанан, Андрей Самсоновичка уонна кини салайар тэрилтэтигэр махталбытын тиэртибит. Оскуолабыт төһө да эп-эргэ буоллар, сып-сылаас. Онон үөрэнэргэ үчүгэй.
Ити курдук аҕыс ый кыһыннаах дойдубут томороон тымныытыгар сылааһы биэрэр олус эппиэтинэстээх үлэлээх тэрилтэ үлэтин-хамнаһын билистибит. Сылааһы хааччыйар дьоммутугар махтанныбыт.
Василена ДМИТРИЕВА, Х кылаас, Карина АНТОНОВА, VIII кылаас
Оператор Вадим Ефремов, Х кылаас
«Кустук» студия, Кеша Алексеев аатынан
Хаптаҕай орто оскуолата, Мэҥэ Хаҥалас