Билигин оҕолор 3-D уруһуйунан, анимациянан, мультик оҥорооһунунан үлүһүйэн туран дьарыктанар буоллулар. Билигин оҕо дьарыктанарыгар бары кыах барыта баар, IT эйгэтигэр үгүс куруһуоктар, уруоктар, маастар-кылаастар ыытыллаллар. Уонна манна бэлиэтээн эттэххэ, худуоһунньуктар, дизайнердар үлэлэрэ отой атын таһымҥа таҕыста диэххэ сөп.
Мин бүгүн эһигини биир эдэр худуоһунньугу кытары билиһиннэриэм. Кини туһунан сырдатыам иннинэ, худуоһунньук олус ураты, чаҕылхай, отой туспа эйгэлээх, ис хоһоонноох уруһуйдарын көрүөххэйиҥ эрэ.
Наһаа үчүгэй уруһуйдар буолбатах дуо? Аатырбыт «Дисней» мультиктарын дьоруойдарыттан туох да итэҕэһэ суохтар уонна сахалыы тыыннаах буолан киһиэхэ наһаа чугас курдуктар!
Худуоһунньук Егор Юрьевич Неустроев Өймөкөөҥҥө олорор. Кини Уус Нера оройуоннааҕы бибилэтиэкэтигэр үлэлиир. Үөрэҕинэн уруһуй учуутала, Намнааҕы педколлеһы бүтэрбит.
— Чысхаан уонна Лаби (Лабыҥкыр) персонажтарын мин 2011 сыллаахха Өймөкөөннөөҕү култуура управлениетын көрдөһүүтүнэн уруһуйдаан саҕалаабытым, оччолорго мин ити тэрилтэҕэ үлэлиир этим. Бу дьоруойдары мин толкуйдаабатаҕым, бэйэм сатыырбынан дьүһүннэрин, сирэйдэрин-харахтарын, быһыыларын-майгыларын уруһуйга түһэрбитим. Онтон ыла «Өймөкөөн — Тымныы Полюһа» диэн тиэмэҕэ уруһуйдарбын сайыннара сатыыбын.
Уруһуйдуурбун оҕо эрдэхпиттэн сөбүлүүбүн. Онтон цифровой уруһуйунан бу аҕыйах сылтан бэттэх дьарыктанар буолбутум. Урут ити өттүгэр нэдиэлэ курдук үлэлиир эбит буоллахпына, билигин уопутуран 1-2 хонугунан уруһуйдаан бүтэбин.
Уонна үлэ тэтимэ уруһуй төһө ыараханыттан, стилистикатыттан уо.д.а. араас тустаах кэрдиилэртэн тутуллар. Оҕо кинигэтин уруһуйугар уонна атын да сакаастарга бэйэбин холонон көрбүтүм. Сакаас билигин аҕыйах киирэр, ол иһин билигин ити өттүгэр дьарыктаммаппын.
Онтон анимация өттүгэр дьарыктанан көрө иликпин, ол да буоллар инникитин ити хайысхаҕа бэйэбин сайыннарыахпын баҕарабын. Холобур, цифровой уруһуйга бэйэм Интернеттэн тустаах уруоктары көрөн үөрэммитим. Интернет ситимигэр онно туһалаах уруоктар олус элбэхтэр. Киһи үөрэниэн сөп. Онон оҕолорго сүбэлиэм этэ, бэйэҕит талааҥҥытын сайыннарар кыахтааххыт, маҥнай сатамматаҕына, киһи онтон хомойор буолбат, хайаан да кыайабын, ситиһэбин диэн санаанан салайтаран олоруҥ, оччотугар сыалгытын хайаан да ситиһиэххит!
Егор Неустроев Индигиир өрүһү хоһуйуута
Саха сирин поеһа
Мин биир бэйэм бу уруһуй дьоруойдары көрөн, хайдах эрэ, өйбөр тута мультик сюжета кэллэ. Көр, талааннаах худуоһунньук уруһуйдара ити курдук киһи өйүгэр-санаатыгар тиллэн, тыыннанан кэлэллэр! Егор Юрьевичка айар үлэтигэр инникитин ситиһиилэри баҕарабыт уонна баҕар, сотору кэминэн, анимационнай киинэ көрүөхпүт диэн эрэнэ хаалабыт.
Егор Неустроев Инстаграм ситимигэр @jeegoor_art диэн аатынан олорор.
Кэпсэттэ Анна СЛЕПЦОВА.