Быйыл олунньу 5-14 күннэригэр биһиги Төхтүрдээҕи Оҕо ускуустубатын оскуолатыттан уонна И.М. Романов аатынан Төхтүр орто оскуолатыттан биэс оҕо — Алико Митрофанова, Сандаара Сергучева, Василина Бурнашева, Коля Яковлев уонна мин, Алгыс Попов, «Тыыннаах Тыл» диэн кэпсээн ааҕыытын күрэҕин бастакы түһүмэҕин ситиһиилээхтик ааһан, иккис түһүмэххэ киирбиппит.
Ол чэрчитинэн «Бэс чагда» оҕо лааҕырыгар ыҥырыллан, умнуллубат күннэри атаардыбыт. Лааҕырга барыта 120 оҕо сылдьыбыта, бары даҕаны үөрэн-көтөн, саҥа доҕоттору булан төнүннүбүт. Манна «Күн Оһуохайа» бырайыак оҕолорун кытта бииргэ сылдьан, сахабыт төрүт үгэстэрин, тылбыт күүһүн дириҥник биллибит. Холобура, сахалыы кэпсээһин уратыларын, киһи кутун-сүрүн тохтотор тойук, оһуохай дэгэттэрин, тылбытынан дьон санаатын хамсатар ускуустуба кистэлэҥнэрин арыйдыбыт.
Күн аайы араас тэрээһиннэр, маастар-кылаастар ыытыллаллара, биллэр-көстөр дьон кэлэн сэһэргэһэн бараллара. Хас киэһэ аайы лааҕыр оҕолоругар анаан ырыаһыттар, артыыстар кэлэн ыллаан-туойан, үөрүү-көтүү бөҕөнү бэлэхтииллэрэ. Бу барыта оҕо сүргэтин өрө көтөҕөн, талааннарын арыйарга улахан тирэх буолла.
Олунньу 13 күнүгэр Саха тыйаатырыгар «Тыыннаах Тыл» күрэххэ кыттан, сүрдээҕин элбэх ситиһиилэннибит. Мин бэйэм ити кэнниттэн, дьэ дьиҥнээхтик артыыс буолуохпун сөп эбит диэн түмүккэ кэллим! Бу лааҕыр олохпор саҥа суолу аста диэхпин сөп.
Лааҕыр кэннэ, олунньу 17 күнүгэр, «Саха» НКИХ тиийэн, «Тэтим» араадьыйатыгар ыалдьыттаатыбыт. Манна эмиэ элбэх саҥа билиини ыллыбыт, араадьыйа үлэтин кытта чугастык билсистибит.
Бука барыгытыгар, сахабыт тылын күүһүн иҥэринэн, инники олоххутугар ситиһиилэри баҕарабын! Өрүү айыы-күҥҥэ тардыһыҥ!
Махталбын тиэрдэбин бу күрэхтэһиигэ биһигитини көҕүлээн кытыннарбыт төрөппүттэрбитигэр, салайааччыбытыгар Вензель Екатерина Ивановнаҕа уонна эҕэрдэлэрин, үтүө тылларын иһин дьоммутугар.
Алгыс Попов,
Мэҥэ-Хаҥалас улууһун И.М. Романов аатынан Төхтүр орто оскуолатын 10-с кылааһын үөрэнээччитэ уонна Оҕо ускуустубатын оскуолатын выпускнига.
Кэскил14.ру