Л.В.Киренскэй аатынан Амматааҕы лиссиэйгэ алтынньы 18 күнүгэр «Басхан» уолаттар өйдөрүн тургутар күрэх буолан ааста. Уопсайа 5 түһүмэх буолла.
Бастакы түһүмэххэ уолаттар удьуордарын туһунан эрдэ бэлэмнэнэн кэлэн чаҕылхайдык сырдаттылар. Ким көлүөнэтин төһө билэринэн диэн сыаналанна.
Иккис түһүмэх «Дойду салайааччылара мин харахпынан» диэн. Манна уолаттар араас кэмҥэ салайа сылдьыбыт дьон туһунан тугу билэллэрин кэпсээтилэр.
Үһүс түһүмэххэ уоланнарбыт өркөн өйдөрүн тургуттулар. 7 ыйытыы биэрдилэр, онно тута хоруйдаатылар. Ыйытыылар үксүлэрэ саха омугун сиэригэр-туомугар, тылыгар-өһүгэр ананна. Маны таһынан эр бэртэрэ буолалларын быһыытынан булт-алт ыйытыылара эмиэ бааллара.
Кэлэр түһүмэххэ дьыалабыай оонньуу буолла, ол эбэтэр дебат. Тиэмэтэ: «Герой диэн кимий?» диэн ыйытыы тула буолла. Уолаттар кими дьоруой, холобур оҥостоллорун сэһэргэстилэр.
Түмүктүүр түһүмэххэ хоһоон строкатын ситэрэн биэрии, тута хоһуйуу буолла. Саха эр бэрдэрэ төһө да симик буоллаллар, ис-истэриттэн туспа дьоҕурдаахтар, талааннаахтар. Ол дьоҕур биһиги уолаттарбытыгар эмиэ бэриллибит эбит диэн тус бэйэбит сыаналаатыбыт. Кылгас бириэмэ иһигэр тута хоһуйан хайҕал бөҕөтүн ыллылар.
Уопсайа барыта 5 уол кыттыыны ылла: X кылаастартан Эдик Налимов уонна Алексей Никитин, IX кылаастан Өркөн Солдатов уонна биһиги кылаастан бииргэ үөрэнэр табаарыспыт, Влад Петров кыттыыны ылла. VIII кылаастан Георгий Петров. Уолаттар бары тус-туспа көрүүлээхтэрин, хорсун санаалаахтарын, мындыр толкуйдаахтарын бигэргэттилэр. Бэлэмнээхтэрэ тута көстөр. Харса суох ыйытыыларга хоруйдууллар. Таҥастара-саптара мааны.
Түһүмэхтэр түмүктэринэн кылаан кыайыылаах биһиги доҕорбут Влад Петров буолла. Биһиги бииргэ үөрэнэр доҕотторо олус үөрдүбүт, астынныбыт, киэн тутуннубут. Кыттыыны ылбыт уолаттар бары маладьыастар. Толлубакка кыттыыны ылан, бэйэлэрин тустарыгар туһалааҕын билэн, эрдэттэн бэлэмнэнэн күрэххэ үрдүк таһымнаахтык кытыннылар. Табаарыспытыгар улуустааҕы күрэххэ ситиһиини баҕарабыт!
Маннык күрэх буолара олус үчүгэй. Уолаттарбыт дьиҥ саха чулуу уолаттара буолалларыгар, дойдуларыгар бэриниилээх, бары өттүттэн доҕурдаах буолалларыгар, санааларын сайа этэллэригэр улахан кылааты киллэрэр.
Снежана РОЖИНА, Ангелина НИКИФОРОВА
IX кылаас үөрэнээччилэрэ
«АЛиК» медиа-киин
Л.В. Киренскэй аатынан Амматааҕы лиссиэй
keskil14.ru